Bu şəxslərə ŞAD XƏBƏR: 41 min ailəyə müavinət ödənildi

Son illərdə sosial ödənişlərin rəqəmsallaşdırılması istiqamətində həyata keçirilən islahatlar çərçivəsində proaktiv təyinat mexanizmlərinin tətbiqi genişlənir. Bu yanaşma uşağın anadan olmasına görə birdəfəlik müavinətin vətəndaş müraciəti olmadan avtomatik təyin edilməsinə imkan yaradır və sosial xidmətlərin əlçatanlığının artırılmasını hədəfləyir. 2026-cı ilin yanvar-iyul ayları ərzində 41 151 nəfərə uşağın anadan olmasına görə proaktiv qaydada birdəfəlik müavinət təyin olunaraq ödənişi həyata keçirilib. Bəs, proaktiv qaydada müavinət təyinatı sosial təminat sisteminin səmərəliliyinə necə təsir edir və bu mexanizm vətəndaşlar üçün hansı üstünlükləri təmin edir?
Məsələ ilə bağlı Sonxeber.az-a açıqlama verən iqtisadçı ekspert Razi Abasbəyli bildirib ki, proaktiv təyinat sistemləri ilk növbədə vətəndaşların dövlət xidmətlərinə əlçatanlığını asanlaşdırır:

"Eyni zamanda, bu sahədə şəffaflığın təmin edilməsinə xidmət edir və insan amilinin rolunu minimuma endirir. Bu sistem regionlarda yaşayan vətəndaşların sosial təminatla bağlı çətinliklərinin aradan qaldırılmasına da kömək edir. Avtomatik təyinat mexanizmi sayəsində vətəndaşların əlavə olaraq dövlət qurumlarına müraciət etməsinə ehtiyac qalmır".

Ekspert bildirib ki, nəticədə sosial təminat sahəsində daha əlçatan, operativ və rahat xidmət mexanizmi formalaşır:

"Əlbəttə ki, bu təyinat mexanizmləri tam avtomatik şəkildə işləyir. Hüquqi mübahisə doğura biləcək müəyyən məqamlar yarandıqda isə sistem onları avtomatik şəkildə təhlil edir və həlli istiqamətində müvafiq mexanizmləri tətbiq edir. Beləliklə, yaranan problemlər operativ şəkildə aradan qaldırılır və bütövlükdə sistem vətəndaşların mənafeyinə uyğun şəkildə fəaliyyət göstərir".

Röyalə Xəyal

Telegramda izləyin