Bu ilanlar əsasən sahilə yaxın ərazilərdə məskunlaşırlar - TƏHLÜKƏ

Son günlər sosial şəbəkələrdə Xəzər dənizində, xüsusilə sahilyanı ərazilərdə zəhərli ilanların, o cümlədən gürzələrin artdığı ilə bağlı yayılan görüntülər və iddialar ictimai narahatlıq yaradıb. Mütəxəssislər isə bildirirlər ki, sosial mediada yayılan məlumatlarla elmi faktlar hər zaman üst-üstə düşmür. Bəs, dənizdə müşahidə olunan ilanlar əsasən hansı növlərə aiddir, onların insanlar üçün təhlükəsi nə dərəcədədir və mövcud vəziyyət aidiyyəti qurumlar tərəfindən əlavə monitorinqin aparılmasını zəruri edirmi?
Məsələ ilə bağlı Sonxeber.az-a açıqlama verən ekoloq Sadiq Həsənov bildirib ki, Xəzər dənizində gürzə ilanı yoxdur.

"Xəzərdə əsasən su ilanları yaşayır. Sosial şəbəkələrdə yayılan görüntülərdə görünən dama-dama naxışlı su ilanlarının həm iri, həm də kiçik ölçülü növlərinə rast gəlinir. Bundan əlavə, Xəzərdə başqa su ilanı növləri də mövcuddur. Bu ilanlar əsasən sahilə yaxın ərazilərdə məskunlaşırlar. Abşeron yarımadasında da onların toplandığı müəyyən ərazilər var. Onlar həm suda, həm də quruda yaşayırlar və uzun illərdir Xəzərin ekosisteminin tərkib hissəsini təşkil edirlər".

Ekoloq bildirib ki, gürzə isə tamamilə fərqli növdür və Xəzər dənizində yaşamır.

"Bu ilan su ilanı deyil, əsasən quru mühitində yaşayır. Abşeron yarımadasının bəzi ərazilərində təsadüfən rast gəlinə bilsə də, ümumilikdə gürzə nə Abşerona, nə də Bakıya xas ilan növü hesab olunur. O, daha çox dağlıq və meşəlik ərazilərdə yaşayır, bəzən su ehtiyacını ödəmək üçün çaylara yaxınlaşır. Xəzər dənizinin suyu duzlu olduğundan bu mühit gürzə üçün uyğun deyil. Buna görə də gürzə ilanının Xəzər dənizində yaşaması mümkün deyil. Ona dağlıq və qayalıq ərazilərdə rast gəlmək mümkündür, lakin Xəzər dənizi üçün xarakterik növ hesab edilmir".

Onun sözlərinə görə, Xəzərdə yaşayan su ilanları min illərdir bu ekosistemin ayrılmaz hissəsidir və bu gün də mövcudluğunu qoruyur. Buna görə də onların görünməsi hər hansı ekoloji və ya çirklənmə probleminin göstəricisi deyil.

Röyalə Xəyal

Telegramda izləyin