"Fast-food" uşaqlar üçün hansı təhlükəni yaradır? - Ekspertdən AÇIQLAMA

"Fast food"(ayaqüstü) qidaların uşaqların sağlamlığına mənfi təsirləri olduqca ciddidir və bu məhsullar həm fiziki, həm də zehni inkişafı ləngidir. Yüksək yağ, şəkər və duz tərkibli bu qidalar uşaqların immun sistemini zəiflədir və xroniki xəstəliklərə zəmin yaradır.

Bununla bağlı Sonxeber.az-a danışan qida eksperti Məhsəti Hüseynova bildirib ki, "fast food" qidaların uşaqların sağlamlığına təsiri kifayət qədər ciddi ola bilər:

"Bu qidalar adətən duz, şəkər və doymuş yağlarla zəngin, vitamin, mineral və lif baxımından isə nisbətən kasıb olur. Uşaqlara əsas təsirlərindən biri artıq çəki riskini artıra bilər. Belə ki, yüksək kalorili qidaların tez-tez qəbul edilməsi uşaqlarda sağlam olmayan çəki artımına səbəb ola bilər. "Fast food" qidaları diş sağlamlığına təsir edir. Şəkərli içkilər və şirin "fast food"məhsulları diş çürüməsi riskini artırır. Elecə də, bu qidalar uşaqların həzm sisteminə də mənfi təsir göstərir. Çünki lifin az olması qəbizlik və digər həzm problemlərinə şərait yaradır".

Ekspert vurğulayıb ki, "fast food" qidalar ürək-damar sağlamlığına da mənfi təsir göstərir. Həddindən artıq duz və doymuş yağların müntəzəm istifadəsi uzunmüddətli perspektivdə qan təzyiqi və ürək-damar sağlamlığı üçün əlverişsiz ola bilər:

"Bu cür qidalanma keyfiyyətini azalda bilər. "Fast food" əsas qidaların yerini tutduqda uşağın zülal, vitamin, mineral və lif ehtiyaclarının tam qarşılanması çətinləşir. Balanssız qidalanma uşağın gün ərzində özünü enerjili hiss etməsinə və dərs zamanı diqqətini toplamasına da mənfi təsir göstərir.

"Fast food" tamamilə qadağan edilməli qida kimi deyil, tez-tez və əsas qidalanma mənbəyi kimi istifadə edilməməli məhsul kimi qiymətləndirilməlidir. Uşaqlar üçün tərəvəz, meyvə, tam taxıl məhsulları, süd məhsulları və zülal mənbələri ilə balanslaşdırılmış qidalanma daha məqsədəuyğundur".

Telegramda izləyin