Valideyn arzusu, yoxsa abituriyentin gələcəyi? - İxtisas seçimində görünməyən TƏZYİQLƏR

Valideynlərin ixtisas seçimində uşaqlara təzyiq göstərməsi gənclərin gələcək karyerasına, psixologiyasına və ailədaxili münasibətlərə ciddi mənfi təsir göstərir. Çox zaman isə valideynlər gənclik xəyallarını övladları vasitəsilə reallaşdırmaq istəyirlər. Ən önəmlisi isə cəmiyyətdə "filankəsin övladı" statusu qazanmaq istəyi bəzən uşağın istəklərindən üstün tutulur.

Bununla bağlı Sonxeber.az-a danışan deputat Jalə Əliyeva bildirib ki, valideynlərin uşaqların ixtisas və peşə seçimində həddindən artıq təzyiq göstərməsi onların gələcək təhsil və karyera qərarlarına mənfi təsir göstərə bilər:

"Təəssüf ki, bəzən ixtisas seçimində uşağın şəxsi maraqları nəzərə alınmır. Valideyn öz arzusunu uşağın istəyindən üstün tuta bilər. Bu da özlüyündə psixoloji gərginlik yaradır. "Mütləq bu ixtisasa daxil olmalısan" kimi tələblər stress və narahatlığı artıra bilər. Valideyn təzyiqi uşaqlarda motivasiyanı azaldır. Uşaq seçdiyi sahəni sevmədikdə dərsə və gələcək peşəsinə marağı zəifləyə bilər.Ən önəmlisi isə özünəinam zədələnir. Uşaq qərarlarının daim valideyn tərəfindən qiymətləndirildiyini düşünə bilər".

Deputat vurğulayıb ki, çox zaman görürsən, gənclər təhsil aldıqları sahə üzrə işləmirlər.

"Şəxsi maraqlara uyğun olmayan ixtisas seçimi sonradan peşə narazılığına səbəb ola bilər. Ona görə də valideynlər ixtisas seçimində uşaqların seçiminə hörmətlə yanaşmalıdır.Valideyn uşağa istiqamət göstərən və dəstək olan şəxs olmalıdır, qərarı onun əvəzinə verən yox. Uşağın maraqları, bacarıqları, akademik göstəriciləri və gələcək planları birlikdə müzakirə edilməlidir. Müxtəlif ixtisaslar haqqında məlumat toplamaq və uşağın həmin sahələri tanımasına imkan yaratmaq daha sağlam seçimə kömək edir.Ən düzgün yanaşma: "Mən sənin üçün qərar vermirəm, amma düzgün qərar verməyin üçün yanında olacağam" bu cümlə uşaqlara düzgün ixtisas seçimi etməyə kömək edəcək".

Telegramda izləyin