Süni intellekt xəbər istehlakını dəyişir - MEDİA EKSPERTİNDƏN AÇIQLAMA

Süni intellektin sürətli inkişafı media sektorunda yeni mərhələnin başlanğıcı hesab olunur. Artıq milyonlarla insan gündəlik xəbərləri xəbər saytlarına daxil olmaq əvəzinə süni intellekt platformalarından əldə edir. Bu isə media qurumlarının auditoriyasına və reklam gəlirlərinə birbaşa təsir göstərir. Bir sıra beynəlxalq media təşkilatları bildirirlər ki, oxucuların əhəmiyyətli hissəsi xəbərin mənbəyinə keçmədən yalnız süni intellektin təqdim etdiyi xülasələrlə kifayətlənir.

Nəticədə xəbər saytlarının ziyarətçi sayı azalır, bu da media sənayesinin gələcək maliyyə dayanıqlığı ilə bağlı narahatlıqları artırır. Bəs süni intellekt ənənəvi medianı həqiqətən geridə qoyur, yoxsa xəbər istehlakının yeni modelini formalaşdırır? Bu sual hazırda həm media rəhbərlərinin, həm də rəqəmsal texnologiya mütəxəssislərinin əsas müzakirə mövzularından biridir.

Mövzu ilə bağlı media eksperti Ayaz Cəfərov Sonxeber.az-a açıqlamasında bildirdi ki, süni intellekt artıq media ilə rəqabət aparmır, xəbər istehlakı vərdişlərini dəyişdirir. Onun sözlərinə görə, əvvəllər insanlar xəbərin tam mətnini oxumaq üçün saytları ziyarət edirdilər: "İndi isə bir çox istifadəçi süni intellektdən qısa xülasə almaqla kifayətlənir. Bu, xəbər saytlarının oxucu trafikinin azalmasına və reklam gəlirlərinin aşağı düşməsinə səbəb olur. Bununla belə, süni intellekt xəbəri özü yaratmır, mövcud mənbələrdən istifadə edir. Əgər peşəkar media zəifləyərsə, gələcəkdə süni intellektin istifadə edəcəyi etibarlı məlumat bazası da azalacaq.

Buna görə media qurumları yeni şəraitə uyğunlaşmalı, eksklüziv xəbərlərə, araşdırmalara və analitik materiallara daha çox üstünlük verməlidirlər. Süni intellekt medianın sonu deyil, lakin onun iş prinsiplərini kökündən dəyişən texnologiyadır".

Telegramda izləyin