Sürücüsüz avtomobillərin hansı riskləri var? - AÇIQLAMA

Sürücüsüz avtomobillər son zamanlarda nəqliyyat texnologiyalarında ən çox müzakirə olunan yeniliklərdən birinə çevrilib. Süni intellekt, sensorlar və avtomatlaşdırılmış idarəetmə sistemləri ilə işləyən bu nəqliyyat vasitələrinin gələcəkdə yol hərəkətində geniş tətbiq ediləcəyi gözlənilir. Bununla yanaşı, onların təhlükəsizlik, hüquqi məsuliyyət və texniki etibarlılığı ilə bağlı müzakirələr də davam edir. Bəs, sürücüsüz avtomobillər hansı texnologiyalar əsasında fəaliyyət göstərir, qərarvermə prosesini necə həyata keçirir və bu sistemlərin yol hərəkəti təhlükəsizliyi baxımından üstünlükləri və mümkün riskləri nələrdir?
Məsələ ilə bağlı Sonxeber.az-a açıqlama verən avtomobil eksperti Razil Nağıyev bildirib ki, sürücüsüz avtomobillər süni intellekt, kamera, radar, LiDAR, GPS və digər sensor texnologiyaları əsasında işləyir.

"Bu sistemlər ətraf mühiti davamlı olaraq izləyir, toplanan məlumatları emal edir, yol nişanlarını, piyadaları və digər nəqliyyat vasitələrini tanıyaraq ən təhlükəsiz hərəkət qərarını qəbul edir. Daha sonra avtomobil sükan, qaz və əyləc sistemlərini avtomatik idarə edir".

Ekspert bildirib ki, bu texnologiyanın əsas üstünlüyü insan səhvlərini azaltması, yol hərəkəti təhlükəsizliyini artırması, yol qaydalarına daha dəqiq riayət etməsi və qəza riskini minimuma endirməsidir:

"Bununla yanaşı, sürücüsüz avtomobillərin bəzi riskləri də mövcuddur. Pis hava şəraiti sensorların işinə mənfi təsir göstərə, texniki nasazlıqlar və proqram təminatındakı səhvlər təhlükəli vəziyyət yarada bilər. Həmçinin kiberhücumlar və qəza zamanı hüquqi məsuliyyətin müəyyənləşdirilməsi bu texnologiyanın qarşısında duran əsas problemlərdən hesab olunur. Sürücüsüz avtomobillər gələcəyin nəqliyyat texnologiyası hesab olunur və yol hərəkəti təhlükəsizliyini əhəmiyyətli dərəcədə artırmaq potensialına malikdir. Lakin onların geniş tətbiqi üçün texniki etibarlılığın, kiber təhlükəsizliyin və qanunvericilik bazasının daha da təkmilləşdirilməsi vacibdir".

Röyalə Xəyal

Telegramda izləyin