Kartdan-karta köçürmələrə bu səbəbdən limit tətbiq olunub - AÇIQLAMA

Kartdan-karta köçürmələrə bu səbəbdən limit tətbiq olunub - AÇIQLAMAKartdan-karta pul köçürmələrinə limit tətbiq olunması maliyyə sektorunda geniş müzakirə olunan məsələlərdən birinə çevrilib. Bu dəyişiklik bir tərəfdən bank əməliyyatlarının təhlükəsizliyinin artırılması və maliyyə nəzarətinin gücləndirilməsi məqsədi daşısa da, digər tərəfdən gündəlik ödənişlərdən istifadə edən vətəndaşlara mümkün təsirləri ilə bağlı suallar yaradır. Bəs, bu limitlərin tətbiqinin əsas məqsədi nədir, bank sektorunda hansı risklərin qarşısını almağa hesablanıb və gündəlik istifadəçilərin maliyyə əməliyyatlarına necə təsir göstərəcək?
Kartdan-karta köçürmələrə bu səbəbdən limit tətbiq olunub - AÇIQLAMAMəsələ ilə bağlı Sonxeber.az-a açıqlama verən bank eksperti Emin Kərimov bildirib ki, kartdan karta ("card-to-card") köçürmə limitinin tətbiq olunmasının əsas məqsədi bu əməliyyatların kommersiya məqsədilə istifadəsinin qarşısını almaqdır.

""Card-to-card" köçürmələri pandemiya dövründə, insanların evdən çıxa bilmədiyi və müxtəlif məhdudiyyətlərin tətbiq olunduğu vaxtlarda ailə üzvlərinə, dostlara və yaxınlara daha rahat, operativ və əlçatan şəkildə pul göndərmək üçün yaradılmış innovativ ödəniş həlli idi. Bu sistem insanların evdən çıxmadan, bank filiallarına və ya ödəniş terminallarına yaxınlaşmadan maliyyə əməliyyatlarını həyata keçirməsinə imkan verirdi. Lakin son dövrlərdə bəzi sahibkarlar, xüsusilə mikro və kiçik biznes subyektləri, bəzi hallarda isə orta biznes nümayəndələri bu sistemin əsas təyinatından kənara çıxaraq ondan kommersiya məqsədilə və vergidən yayınmaq üçün istifadə etməyə başladılar. Məsələn, məhəllə marketində, kafedə, restoranda və ya digər kiçik ticarət obyektlərində kartla ödəniş etmək istədikdə alıcıya müxtəlif bəhanələrlə POS-terminalın işləmədiyi bildirilir və vəsaiti birbaşa satıcının şəxsi kartına köçürməsi xahiş olunur. Bu zaman eyni anda bir neçə qanun pozuntusu yaranır".

Ekspert bildirib ki, ilk növbədə, sahibkar vergidən yayınmış olur:

"İkincisi, alıcının şəxsi məlumatları tanımadığı şəxslə paylaşılır. Üçüncüsü isə, vəsaiti köçürdüyünüz şəxsi tanımadığınız üçün gələcəkdə həmin kart üzrə yarana biləcək risklər dolayısı ilə sizə də təsir göstərə bilər. Beləliklə, vətəndaş eyni anda bir neçə istiqamətdə risklə üzləşir. Hətta ilin əvvəlində Dövlət Vergi Xidməti də kommersiya məqsədilə "card-to-card" əməliyyatlarından istifadə edilməsinin aşkarlandığı hallarda cərimə sanksiyalarının tətbiq olunacağını bəyan etmişdi. Lakin bu xəbərdarlıqlar gözlənilən effekti vermədi və nəticədə bu üsulla vergidən yayınma halları daha da geniş yayıldı. Məhz buna görə də yeni qaydalar qəbul edildi. Hesab edirəm ki, bu qərar doğru yanaşmadır".

Onun sözlərinə görə, sahibkar POS-terminal əvəzinə ödənişi şəxsi kartına qəbul etdikdə, bir tərəfdən vergidən yayınır, digər tərəfdən isə istehlakçının hüquqlarını məhdudlaşdırır:

"Məsələn, siz hər hansı mağazadan geyim və ya ayaqqabı alırsınız, lakin ödənişi satıcının şəxsi kartına köçürürsünüz. Bu zaman sizə nə fiskal qəbz təqdim olunur, nə də məhsulun qanunvericilikdə nəzərdə tutulan müddətdə geri qaytarılması hüququnu təsdiq edən sənəd verilir. Sabah məhsulu geri qaytarmaq istədikdə isə ödənişi təsdiqləyən rəsmi sənədiniz olmadığı üçün hüquqlarınızı müdafiə etməkdə çətinlik yaşaya bilərsiniz. Əlinizdə yalnız hansısa fiziki şəxsin kartına edilmiş köçürmənin qəbzi olur. Bu isə istehlakçı hüquqlarının pozulmasına səbəb olur. Yeni qaydalar həm də bu problemin qarşısının alınmasına xidmət edir".

"Hazırkı şəraitdə sahibkarlar üçün alternativ həll yolları mövcuddur. Mikro və kiçik biznes nümayəndələri elektron pul və ödəniş təşkilatlarına müraciət etməklə link ödənişləri, QR ödənişləri, POS və mobil POS xidmətlərindən istifadə edə bilərlər. Elektron pul təşkilatları müasir və innovativ ödəniş həlləri təqdim edir, dünya təcrübəsindən istifadə edərək ölkəmizdə yeni texnologiyalar tətbiq edirlər. Hətta bəzi istiqamətlər üzrə onların təqdim etdiyi həllər bank xidmətlərindən daha çevik hesab olunur. Sahibkarlar bu qurumlara müraciət etməklə alqı-satqı əməliyyatlarını tam qanuni şəkildə həyata keçirə, dövriyyələrini şəffaf formada rəsmiləşdirə bilərlər. Üstəlik, elektron pul və ödəniş təşkilatları Mərkəzi Bankın verdiyi lisenziya əsasında fəaliyyət göstərdiklərinə görə onların fəaliyyəti tam qanuni və etibarlıdır" - o qeyd edib.

Emin Kərimov bildirib ki, bu qaydaların tətbiq edilməsinin əsas zərurəti vergidən yayınmanın qarşısının alınması, istehlakçı hüquqlarının qorunması və ödəniş sistemində şəffaflığın artırılmasıdır:

"Çıxış yolu isə sahibkarların müasir və qanuni elektron ödəniş alətlərindən istifadə etməsidir. Sadə vətəndaşlara gəldikdə isə, bu dəyişiklik onların gündəlik köçürmələrinə ciddi təsir göstərməyəcək. Çünki fiziki şəxslər gün ərzində adətən 3-4 dəfə kartdan karta köçürmə həyata keçirirlər. Bəzi hallarda, məsələn əməkhaqqı və ya digər gəlirlərin daxil olduğu günlərdə bu rəqəm 5-6 əməliyyata çata bilər. Müəyyən edilmiş limit adi istifadəçilərin gündəlik ödəniş vərdişləri üçün kifayət qədər normal hesab olunur. Bundan əlavə, vətəndaşlar ödənişlərini daha səmərəli şəkildə planlaşdıra bilərlər. Məsələn, gün ərzində eyni şəxsə beş dəfə 10 manat köçürmək əvəzinə, bir dəfə 50 manat göndərmək mümkündür. Çünki məbləğ üzrə müəyyən edilmiş aylıq limit kifayət qədər yüksəkdir və bu yanaşma həm əməliyyat sayını azaldır, həm də mümkün komissiya xərclərinin qarşısını alır".

Röyalə Xəyal


Sonxeber.az
Telegramda izləyin
Sosial   Baxılıb: 2658   Tarix: 06 avqust 2026  

Şikayətiniz varsa Whatsapp: 077 7125666

Facebookda Paylaş


Oxşar xəbərlər

.

Milli kimliyin qorunması, Azərbaycan həqiqətlərinin təbliği və informasiya təhlükəsizliyinin strateji əhəmiyyəti

Azərbaycan Respublikasının Prezidenti İlham Əliyevin milli radio və televiziya yayımının yubileyi münasibətilə televiziya və radio işçilərinə ünvanladığı müraciət ölkəmizin informasiya siyasətinin prioritetlərini, milli-mənəvi dəyərlərin qorunmasının əhəmiyyətini və teleradionun dövlətçilik tariximizdək

16 noyabr
.

Bab əl-Məndəb və Hörmüz eyni vaxtda risk altında: Azərbaycan tranzit marşrutları üçün bunun mənası nədir?

Körfəzdə gərginlik yenidən artıb. Noyabrın 13-də İran İnqilab Keşikçiləri Korpusu Bəhreyndəki ABŞ radarına hücum etdiyini açıqladı. ABŞ Mərkəzi Komandanlığı (CENTCOM) iki dronun vurulduğunu bildirdi, itki və zərər olmadığını dedi və radar iddiasını təkzib etdi (Al Jazeera, Reuters). Hər iki tərəfin iddias

16 noyabr
.

Azərbaycanda Milli Dirçəliş Günüdür

Bu gün - noyabrın 17-si Azərbaycanda Milli Dirçəliş Günüdür. Bayram 1988-ci ilin noyabr-dekabrında Bakıda başlayan milli-azadlıq hərəkatı ilə bağlıdır. Həmin vaxt SSRİ rəhbərliyinin Qarabağ məsələsi ətrafında apardığı anti-Azərbaycan siyasəti nəticəsində Azərbaycanda antisovet xalq hərəkatı təşəkkü

17 noyabr
.

"Mahal MTK"da rüşvət və özbaşınalıq - Müştəriləri belə aldadırlar

Sumqayıt şəhərində fəaliyyət göstərən "Mahal MTK" tərəfindən tikilib sakinlərə təhvil verilməli olan mənzillərlə bağlı ciddi problemlər yaranıb. Tikinti şirkətinin qanunsuz tələbləri və vədlərinə əməl etməməsi vətəndaşların haqlı narazılığına səbəb olub. Məlumata görə, "Mahal MTK"

16 noyabr
.

"Boranı" restoranında tək yeyib-içmək olmaz? - Video

Sosial şəbəkələrdə "Boranı" restoranlar şəbəkəsi ilə bağlı şikayət yayılıb. xəbər verir ki, şikayətçinin iddiasına görə, restoranın "Neftçilər" metrosu yaxınlığında yerləşən filialına tək daxil olmaq istəyən müştəriyə icazə verilməyib. Ona bildirilib ki, yalnız 3-4 nəfərlə gəldikd

16 noyabr
.

Balıq bazarında bahalaşma var - Video

Bir həftədir bəzi balıqların qiymətində artım müşahidə olunur. Xəzər TV-yə istinadən bildirir ki, balıq almaq istəyənlər bazarda fərqli qiymətlərlə qarşılaşırlar. Satıcıların sözlərinə görə, ötən həftə ilə müqayisədə bəzi balıq növlərinin qiymətində artım var. Xüsusilə İrandan gətirilən məhsullarda bahalaşm

15 noyabr
.

Rəşid Mahmudovun evində partlayış baş verib?

Sosial şəbəkələrdə tanınmış həkim, tibb elmləri üzrə fəlsəfə doktoru Rəşid Mahmudovun evində qaz partlayışı baş verməsi ilə bağlı iddialar yayılıb. xəbər verir ki, paylaşımlarda iddia olunub ki, parlayış həkimin Badamdarda yerləşən evində baş verib. Məsələ ilə bağlı Rəşid Mahmudovla əlaqə saxladıq. Həki

17 noyabr
.

Noyabr ayının pensiyaları ödənildi

Bu gün Bakı, Sumqayıt şəhərləri və Abşeron rayonu üzrə noyabr ayının pensiyaları ödənilib. xəbər verir ki, bu barədə Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondu məlumat yayıb. Naxçıvan Muxtar Respublikasının Əmək və Əhalinin Sosial Müdafiəsi Nazirliyinin tabeliyind

17 noyabr
.

Bakıda DƏHŞƏT: Avtobus gənc qızı vuraraq öldürdü

Bakıda səhər saatlarında ölümlə nəticələnən yol-nəqliyyat hadisəsi baş verib. -in "qaynar xətti"nə daxil olan məlumata görə, hadisə Koroğlu metrostansiyasının çıxışında qeydə alınıb. "Daewoo" markalı sərnişin avtobusu yolu keçən gənc qızı vurub. Zərbənin təsirindən ağır xəsarət ala

16 noyabr