Mal ətinin qiyməti BAHALAŞDI: Səbəb nədir?

İsmayıllı rayonunda mal ətinin pərakəndə satış qiymətinin 1 manat artaraq 17 manatdan 18 manata yüksəlməsi ərzaq bazarında qiymət dinamikası ilə bağlı müzakirələri yenidən gündəmə gətirib. Qiymət artımı həm istehsalçılar, həm də istehlakçılar üçün əhəmiyyətli məsələ hesab olunur. Bəs, bu bahalaşmanın arxasında hansı iqtisadi amillər dayanır və diri heyvanların alış qiymətinin artması, istehsal xərcləri, eləcə də bazardakı təklif və tələbin dəyişməsi pərakəndə satış qiymətlərinə necə təsir göstərir?
Məsələ ilə bağlı Sonxeber.az-a açıqlama verən iqtisadçı ekspert Natiq Cəfərli bildirib ki, Azərbaycanda ətin qiyməti davamlı olaraq artır və bunun kifayət qədər obyektiv səbəbləri var.

"Ölkədə iribuynuzlu və xırdabuynuzlu mal-qaranın sayı ildən-ilə azalır. Bu məsələ ilə bağlı Kənd Təsərrüfatı Nazirliyi daha ciddi tədbirlər görməlidir. Çünki mal-qaranın sayının azalması ümumilikdə ət bazarında təklifə təsir edir və nəticədə qiymətlərin yüksəlməsinə səbəb olur".

Ekspert bildirib ki, bundan əlavə, demək olar ki, bütün sahələrdə qiymət artımı müşahidə olunur:

"Digər məhsulların qiyməti bahalaşdıqca, ət satışı ilə məşğul olan şəxslər də qiymətlərini artırmağa məcbur qalırlar. Çünki onlar da istehlakçıdırlar. Məsələn, ət satdıqdan sonra əldə etdikləri vəsaitlə un, düyü, yağ və digər məhsullar alırlar. Həmin məhsulların qiyməti yüksəldikdə, onlar da artan xərclərə uyğunlaşmaq üçün satdıqları ətin qiymətini artırırlar".

Onun sözlərinə görə, qiymət artımı iki əsas amillə bağlıdır:

"Bir tərəfdən, ölkədə iribuynuzlu və xırdabuynuzlu mal-qaranın sayının azalması nəticəsində bazarda təklif zəifləyir. Digər tərəfdən isə iqtisadiyyatda ümumi qiymət artımı fonunda ətin də qiyməti yüksəlir".

Röyalə Xəyal

Telegramda izləyin