Boşanma uşaqlarda hansı fəsadlarla nəticələnir? - DİQQƏT

Boşanma, yalnız həyat yoldaşları üçün deyil, uşaqlar üçün də emosional və sosial baxımdan çətin bir prosesdir. Valideynlər ayrıldıqdan sonra uşaqların psixoloji sağlamlığını qorumaq və onların balanslı şəkildə böyüməsini təmin etmək üçün düzgün yanaşmalar tətbiq etməlidirlər.

Mövzu ilə bağlı Sonxeber.az-a danışan psixoloq Leyla Alışova bildirib ki, boşanmış ailələrdə böyüyən uşaqların psixologiyası onun yaşından, valideynlər arasındakı münasibətdən və boşanmadan sonra ona göstərilən dəstəkdən asılı olaraq fərqli təsir göstərə bilər.

Uşaqlarda yarana bilən psixoloji reaksiyalardan özünü günahlandırma, kədər və narahatlıq hissidir. Ailənin əvvəlki vəziyyətinin dəyişməsi uşağı narahat edə bilər. Bəzi uşaqlar valideynlərinin ayrılmasına görə özlərini səbəbkar hesab edə bilərlər. Boşanmış ailələrdə böyüyən uşaqlar daha çox tərk edilmək qorxusu olur.Valideynlərdən birini itirmək və ya onunla əvvəlki qədər görüşə bilməmək qorxusu yarana bilər.

Həmin uşaqlarda davranış dəyişiklikləri yəni aqressivlik, qapanıqlıq, diqqətin azalması və ya dərslərə marağın zəifləməsi müşahidə oluna Ümumilikdə isə Valideynlər arasında davamlı münaqişə uşağın gələcək münasibətlərə və ailəyə baxışına təsir göstərir".

Psixoloq sadalanan bu davranış dəyişikliklərin yaşa görə fərqli olduğunu da vurğulayıb.

Yaş Qruplarına Görə Reaksiyalar aşağıdakılardır:

0-3 yaş: Gərginliyi hiss edirlər.Ağlamaq krizisləri artır, yuxu rejimi pozulur.

3-6 yaş:Özünü günahlandırma başlayır.Qaranlıq qorxusu yaranır.Altını islatma müşahidə olunur.

7-12 yaş:Məktəb uğuru aşağı düşür.Dostlarından uzaqlaşırlar.Qəzəb partlayışları yaşayırlar.Yeniyetməlik (12+ yaş):Depressiyaya meyil artır.Evdən uzaqlaşmaq istəyirlər.Zərərli vərdişlərə yönələ bilərlər.

Bu kimi problemlərin olmaması üçün her iki valideynin üzərinə müəyyən öhdəliklər düşür. Ən vacib məsələ uşağa "sən günahkar deyilsən" mesajının verilməsidir. Valideynlər uşağı öz münaqişələrinə cəlb etməməli, digər valideyn haqqında onun yanında mənfi danışmamalı və mümkün qədər sabit gündəlik rejim yaratmalıdırlar.

Uşağın hisslərini dinləmək, onun suallarına yaşına uyğun və dürüst cavab vermək, məktəbdəki vəziyyətini izləmək də vacibdir. Güclü və uzunmüddətli narahatlıq, ciddi davranış dəyişiklikləri və ya dərslərdə kəskin geriləmə müşahidə olunarsa, uşaq psixoloqundan dəstək almaq faydalıdır".

Telegramda izləyin