Uşaqpulu yenidən bərpa OLUNUR? - Deputatdan AÇIQLAMA

Son dövrlər deputatlar, sosioloqlar və digər mütəxəssislər uşaqpulunun yenidən bərpa edilməsi ilə bağlı təkliflər irəli sürürlər. Bu məsələ bir neçə dəfə Milli Məclisin plenar və komitə iclaslarında da müzakirə olunub.

Bununla bağlı Sonxeber.az-a danışan deputat Aydın Mirzəzadə bildirib ki, bu gün hər kəs, xüsusilə də aztəminatlı ailələr uşaqpulunun yenidən bərpa olunmasını istəyir:

"Bu məsələ Milli Məclisdə dəfələrlə müzakirə olunub və həmkarlarım bununla bağlı öz fikirlərini irəli sürüblər:

"Uşaqpulunun yenidən bərpa edilməsi ilə bağlı qərar vermək bizim öhdəliyimizdə deyil. Bununla bağlı müvafiq dövlət orqanları hesablamalar aparıb, icrası mümkün olan variantları araşdırmalıdır. Əlbəttə uşaqpulunun yenidən bərpası hər birimizin arzusudur. Hazırda aztəminatlı ailələr sosial yardım alırlar. Bundan əlavə bu gün ölkədə 10-dan çox sosial müavinət növü var. Həmin müavinətlərin hər biri də məhz uşaqların sosial müdafiəsinə yönəlib. Sağlamlıq imkanları məhdud 18 yaşadək uşaqlar, şəhid ailələrinin və müharibə əlillərinin, beşdən çox uşağı olan qadınların, müddətli həqiqi hərbi xidmət qulluqçularının uşaqları, valideyn himayəsindən məhrum olmuş uşaqlar aylıq sosial müavinətlə təmin edilirlər. Həmçinin aztəminatlı (ünvanlı dövlət sosial yardımı alan) ailələrin 1 yaşadək uşaqlarına aylıq sosial müavinət, yeni doğulan uşaqlara görə isə birdəfəlik müavinət ödənilir. Eləcə də Çernobıl AES qəzası nəticəsində I və II qrup əlil olmuş, yaxud vəfat etmiş valideynlərin uşaqlarına, habelə Çernobıl qəzası nəticələrinin aradan qaldırılması iştirakçılarının dispanser qeydiyyatında olan uşaqlarına da müavinət verilir. Ailə başçısını itirmiş ailələrə də aylıq sosial müavinət və ya əmək pensiyası ödənilir ki, həmin ailələrin üzvlərinin böyük əksəriyyətini, habelə ünvanlı sosial yardım alan ailələrin üzvlərinin 50 faizdən çoxunu uşaqlar təşkil edir. Valideynlərini itirmiş və valideyn himayəsindən məhrum olmuş uşaqların qəyyumları (himayəçiləri) aylıq sosial müavinətlə təmin edilirlər. Sığortaolunanlara da üç yaşınadək uşaqlara qulluğa görə müavinət ödənilir. Qeyd etdiyim bu müavinətlər mütəmadi olaraq artırılır.Bütün müavinətlərin hər biri uşaqların sosial müdafiəsinə yönəlib. 2000-ci illərin əvvəllərində Azərbaycanda "uşaq pulu" şəklində verilməsi həyata keçirilirdi. Lakin sonradan uşaqpulu ləğv olunaraq uşağı olan və ya olmayan aztəminatlı ailələrin də sosial müdafiəsini də dövlət öz üzərinə götürdü. Çünki bir çoxları uşağı olmayan aztəminatlı ailələrin də nəzərə alınması ilə bağlı təkliflər irəli sürürdü. O ailələrə müavinətlər verilməsi təklif olundu. Məhz buna görə də dövlət tərəfindən ünvanlı sosial yardım prinsipinə üstünlük verildi. Qaldı ki, uşaqpulunun bərpasına bütün mümkün variantlar araşdırıldiqdan sonra bununla bağlı qərar verilə bilər".

Telegramda izləyin