Bu universitetlər BAĞLANA BİLƏR - XƏBƏRDARLIQ

Bakı Qızlar Universitetinin fəaliyyətinin dayandırılması ali təhsil müəssisələrinin fəaliyyəti məsələsini yenidən gündəmə gətirib. Bu qərar universitetlərin keyfiyyət standartlarına uyğunluğu, tədris və idarəetmə prosesləri, maddi-texniki baza və digər tələblərin nə dərəcədə vacib olduğunu göstərir.

Bəs, ali təhsil müəssisələri hansı hallarda akkreditasiya baxımından risk altına düşür, bu riskləri əvvəlcədən hansı göstəricilərdən müəyyən etmək mümkündür və akkreditasiya zamanı universitetlərin hansı çatışmazlıqları daha ciddi qiymətləndirilir?
Məsələ ilə bağlı Sonxeber.az-a açıqlama verən təhsil eksperti Məzahir Məmmədli bildirib ki, Azərbaycanda ali təhsil müəssisələri üçün müəyyən edilmiş vahid standartlar var.

"Bu standartlara uyğun gəlməyən universitetlərdə isə müvafiq tədbirlər görülür və tələblərə cavab verməyən ali təhsil müəssisələrinin fəaliyyəti dayandırıla bilər. Akreditasiya prosesində bir sıra mühüm meyarlar nəzərə alınır. Bunlardan biri professor-müəllim heyətidir. Eyni zamanda, auditoriyaların tələbə sayına uyğunluğu da əsas komponentlərdəndir. Normativ hüquqi aktlara əsasən, hər bir tələbə üçün müəyyən edilmiş minimum sahə təmin olunmalıdır. Bundan əlavə, laboratoriyaların və digər infrastrukturun da müəyyən olunmuş standartlara uyğun olması vacibdir".

Ekspert bildirib ki, ali təhsil müəssisələri üçün vahid akreditasiya standartları mövcuddur və bu standartlar müəyyən dövrlər üzrə yoxlanılır:

"Akreditasiya prosesi hər beş ildən bir həyata keçirilir və bu istiqamətdə Təhsildə Keyfiyyət Təminatı Agentliyi tərəfindən müvafiq qiymətləndirmə aparılır və rəy verilir. Təəssüf ki, uzun illər fəaliyyət göstərən bəzi universitetlərdə də akreditasiya standartlarına tam uyğun gəlməyən müəyyən sahələrə rast gəlinir. Ötən illərdə də Azərbaycanda fəaliyyət göstərən bir sıra ali təhsil müəssisələri ilə bağlı akreditasiya standartlarına uyğun olmayan məqamların olduğu açıqlanmışdı. Belə hallarda Təhsildə Keyfiyyət Təminatı Agentliyi tərəfindən universitetlərə xəbərdarlıq edilir və onlara mövcud çatışmazlıqları normativ hüquqi aktların müəyyən etdiyi tələblərə uyğunlaşdırmaq üçün müddət verilir".

Onun sözlərinə görə, bu tələbləri yerinə yetirməyən, yəni akreditasiya standartlarına cavab verməyən universitetlərin fəaliyyəti isə dayandırıla bilər:

"Bu baxımdan Bakı Qızlar Universitetinin fəaliyyəti ilə bağlı yaranmış vəziyyəti də qeyd etmək olar. Hazırda Təhsildə Keyfiyyət Təminatı Agentliyinin bir neçə universitetə ayrı-ayrı sahələr üzrə müəyyən xəbərdarlıqları var. Məsələn, hansısa universitetin konkret istiqamət üzrə müəyyən çatışmazlığı ola bilər. Lakin hazırda abituriyentlərin seçim mərhələsində olduğunu nəzərə alaraq konkret universitetlərin adını çəkmək istəmirəm. Çünki bu fikirlər müəyyən mənada onların seçimlərinə təsir göstərə bilər. Bununla belə, bir məqamı xüsusilə vurğulamaq istəyirəm, Azərbaycanda fəaliyyət göstərən dövlət və özəl ali təhsil müəssisələri eyni standartlara, yəni Nazirlər Kabineti tərəfindən müəyyən edilmiş tələblərə uyğun fəaliyyət göstərirlər. Bu tələblərə cavab verən universitetlərin verdiyi diplomların tanınması ilə bağlı hər hansı problem yoxdur".

Məzahir Məmmədli qeyd edib ki, Azərbaycanda müxtəlif dövrlərdə Azərbaycan Beynəlxalq Universiteti, Azərbaycan Asiya Universiteti, Təfəkkür Universiteti və Bakı Qızlar Universiteti kimi bir sıra ali təhsil müəssisələrinin fəaliyyəti dayandırılıb:

"Ola bilsin ki, siyahıda qeyd etmədiyim digər universitetlər də var. Lakin bu universitetlərin fəaliyyətinin dayandırılması onların özəl ali təhsil müəssisəsi olması ilə bağlı deyil. Əsas səbəb müəyyən edilmiş standartlara və tələblərə cavab verməmələri olub. Ona görə də Azərbaycanda fəaliyyət göstərən dövlət və ya özəl universitetin Nazirlər Kabineti tərəfindən təsdiq edilmiş tələblərə uyğun fəaliyyət göstərməsi əsas meyardır. Bu tələblərə cavab verən ali təhsil müəssisələrinin diplomlarının tanınması ilə bağlı hər hansı problem yoxdur".

Röyalə Xəyal

Telegramda izləyin