Ekspress avtobusları ödənişsiz OLMAYACAQ: Sərnişinlərdən NARAZILIQ

Bakı Metropolitenində xətlərin ayrılması ilə əlaqədar sərnişinlərin alternativ nəqliyyat vasitələrindən istifadəsi məsələsi yenidən gündəmə gəlib. Bu prosesdə ekspres avtobusların tətbiqi sərnişin axınının yönləndirilməsi və metroda yaranacaq əlavə yükün azaldılması baxımından mühüm rol oynaya bilər. Lakin həmin avtobusların ödənişsiz olmaması sərnişinlər arasında narazılıqlara səbəb olub. Bu məsələ onların seçimlərinə və ictimai nəqliyyatdan istifadəyə təsir göstərə biləcək amil kimi qiymətləndirilir.

Bəs, xətlərin ayrılması dövründə ekspres avtobusların ödənişli olması nəqliyyatın planlaşdırılması baxımından nə dərəcədə əsaslandırılmış qərardır və bu yanaşma sərnişin axınının idarə olunmasına necə təsir göstərə bilər?
Məsələ ilə bağlı Sonxeber.az-a açıqlama verən nəqliyyat eksperti Yasin Mustafayev bildirib ki, bu, bir qədər ağır prosesdir və hazırda müəyyən qədər bütün sahələrə, xüsusilə də nəqliyyat sektoruna təsir göstərəcək.

"Metropolitenin üzərinə düşən yükün müəyyən hissəsini artıq avtobuslar, taksilər və digər nəqliyyat vasitələri öz üzərinə götürməyə məcburdur. Təbii ki, bu müddətdə müəyyən çətinliklər və sıxlıqlar yaranacaq. Təxminən 10 aylıq bir müddətdən söhbət gedir və biz bu prosesə müəyyən qədər dözməliyik. Çünki xətlərin ayrılması həyata keçirilməsə, ictimai nəqliyyatın əsas dayaqlarından biri olan metropoliteni inkişaf etdirmək mümkün olmayacaq. Xətlər ayrılmalıdır ki, qatarlar arasındakı intervalı azaltmaq və hər bir xətti ayrıca inkişaf etdirmək mümkün olsun. Yəni biz bu prosesi məcburiyyətdən həyata keçiririk".

Ekspert bildirib ki, ekspress avtobuslara gəldikdə isə, müxtəlif istiqamətlər üzrə əlavə avtobus marşrutları müəyyən edilib:

"Bu, yalnız 28 May-Gənclik istiqaməti ilə məhdudlaşmır. Ümumiyyətlə, 28 May-Gənclik arasında ayrıca ekspress avtobus xətti təşkil edilməyib. Çünki bütün sərnişinləri həmin istiqamətdə toplayaraq bir nöqtədən digərinə daşımaq düzgün olmazdı. Bunun əvəzinə Koroğlu, Gənclik və Nərimanov stansiyalarından digər istiqamətlərə, o cümlədən Elmlər Akademiyası, İnşaatçılar, 20 Yanvar və digər istiqamətlərə ekspress avtobuslar təşkil edilib. Güman edirik ki, müəyyən çətinliklərə baxmayaraq, bu dövrü qarşılıqlı anlayış göstərərək birlikdə başa vuracağıq".

Röyalə Xəyal

Telegramda izləyin