Gədəbəydə 3 məktəb bağlandı: Şagird və müəllimlərin aqibəti necə olacaq?

Gədəbəy rayonunda 3 məktəbin fəaliyyəti dayandırılıb. Bunlar Gədəbəy şəhəri 4 nömrəli məktəbi, Toplar kənd məktəbi və Günəşli kənd məktəbidir.

Məlumata görə, məktəblərin fəaliyyəti dayandırılarkən buna səbəb kimi şagird sayının normadan aşağı olması göstərilib.

Bəs bağlanan məktəblərin şagirdləri təhsillərini hansı məktəblərdə davam etdirəcək, eləcə də ixtisara düşən müəllimlərin taleyi necə olacaq?

Qazax-Tovuz Regional Təhsil İdarəsindən Tiraj.az-ın sorğusuna cavab olaraq bildirilib ki, 2026-2027-ci tədris ilində şagird sayının az olduğu Gədəbəy rayonu Toplar kənd ibtidai ümumtəhsil məktəbinin, Gədəbəy şəhəri 4 nömrəli ümumi orta ümumtəhsil məktəbinin, Gədəbəy rayonu Günəşli kənd tam orta ümumtəhsil məktəbinin optimallaşdırılması nəzərdə tutulub:

"Qeyd edirik ki, proses çərçivəsində mövcud qanunvericiliyin tələbləri gözlənilməklə təhsilverənlərin və təhsilalanların hüquq və mənafelərinin qorunması diqqət mərkəzində saxlanılaraq məktəbin pedaqoji heyəti və şagirdləri yaxın ərazilərdə məktəblərə yerləşdirilib".

Qurum həmçinin qeyd edib ki, ümumi təhsil müəssisələri şəbəkəsində optimallaşdırma tədbirləri təhsilin keyfiyyətinin artırılması, şagirdlərin daha əlverişli tədris mühitinə çıxışının təmin edilməsi, pedaqoji kadr təminatının yaxşılaşdırılması və mövcud resurslardan daha səmərəli istifadə olunması məqsədilə həyata keçirilir.

Telegramda izləyin