İsti havada açıq satılan qidalar nə qədər təhlükəlidir? - Küçə yeməkləri ilə bağlı vacib məqamlar - QİDA EKSPERTİNDƏN AÇIQLAMA

Yay mövsümündə havanın temperaturunun yüksəlməsi qidaların daha tez xarab olmasına və sağlamlıq üçün risk yaratmasına səbəb ola bilər. Xüsusilə açıq şəraitdə, günəş altında və ya lazımi temperatur rejimi təmin edilmədən satılan qida məhsulları bakteriyaların sürətlə çoxalması üçün əlverişli mühit yaradır. Bu isə qida zəhərlənmələri və müxtəlif infeksion xəstəliklərin yaranma riskini artırır.

Küçə yeməklərinə marağın artdığı bir dövrdə açıq vitrində satılan məhsulların təhlükəsizliyi və bu sahədə nəzarət mexanizmlərinin effektivliyi yenidən gündəmə gəlir. Bəs isti havada açıq satılan qidalar nə dərəcədə təhlükəlidir? Küçə yeməkləri və açıq vitrində satılan məhsullara nəzarət necə aparılır?
Mövzu ilə bağlı qida eksperti Fərid Səfərov Sonxeber.az-a açıqlamasında bildirdi ki, yay aylarında isti hava açıq şəkildə satılan qidalar üçün ən böyük risk amillərindən biridir. Onun sözlərinə görə, xüsusilə 30°C-dən yuxarı temperaturda qidaların tərkibində olan bakteriyalar daha sürətlə çoxalır və bu da qida zəhərlənməsi riskini əhəmiyyətli dərəcədə artırır: "Ət, toyuq, balıq, süd məhsulları, kremli şirniyyatlar, salatlar və bişmiş yeməklər açıq şəraitdə uzun müddət saxlanıldıqda təhlükəli mikroorqanizmlər üçün əlverişli mühit yaranır. Küçə yeməkləri və açıq vitrində satılan məhsulların hamısı təhlükəli hesab edilmir. Əsas məsələ onların hazırlanma, saxlanma və satış şəraitidir. Qidalar tozdan, həşəratlardan və birbaşa günəş şüalarından qorunmalı, temperatur rejiminə riayət edilməli, satıcılar isə şəxsi gigiyena qaydalarına əməl etməlidirlər. Bu tələblər pozulduqda məhsulun təhlükəsizliyi ciddi şəkildə azalır.

Nəzarət isə müvafiq dövlət qurumları tərəfindən planlı və plandankənar yoxlamalar, laborator analizlər və sanitariya-gigiyena tələblərinin qiymətləndirilməsi yolu ilə həyata keçirilir. Tələblərə cavab verməyən məhsullar satışdan çıxarıla, sahibkarlar isə məsuliyyətə cəlb oluna bilərlər.

İstehlakçılar da diqqətli olmalıdırlar. Açıq havada uzun müddət qalmış, üzəri örtülməyən, xoşagəlməz qoxusu və ya görünüşü dəyişmiş qidaları almaqdan çəkinmək lazımdır. Xüsusilə yay aylarında etibarlı satış məntəqələrinə üstünlük vermək qida zəhərlənməsinin qarşısını almaqda mühüm rol oynayır.

Sağlam qidalanaraq sağlam yaşayın!".

Telegramda izləyin