Sənədsiz evi olanların NƏZƏRİNƏ: Bunu etməlisiniz

Azərbaycanda sənədsiz evlərin rəsmiləşdirilməsi və həmin daşınmaz əmlaka çıxarış alınması məsələsi uzun illərdir vətəndaşları narahat edən problemlərdən biridir. Qeydiyyat üçün evin yerləşdiyi torpaq sahəsinə dair hüququn və tikilinin qanuni əsaslarla inşa edildiyini təsdiqləyən sənədlərin olması mühüm şərtlərdən sayılır. Xüsusilə tikilinin inşa edildiyi tarixdən asılı olaraq tələb olunan sənədlər də fərqlənə bilər.

Bəs, sənədsiz evlər hansı hallarda rəsmiləşdirilə və onlara çıxarış verilə bilər, vətəndaş bunun üçün hansı sənədləri toplamalı və hara müraciət etməlidir?
Məsələ ilə bağlı Sonxeber.az-a açıqlama verən əmlak məsələləri üzrə ekspert Ramil Osmanlı bildirib ki, Azərbaycanda daşınmaz əmlakın sənədləşdirilməsi qaydaları "Daşınmaz əmlakın dövlət reyestri haqqında" qanunla müəyyən olunur və tənzimlənir.

"Həmin qanunun 8-ci maddəsinin tələblərinə cavab verən daşınmaz əmlak obyektlərinin qeydiyyatı üçün əsaslar olduqda, yəni 8-ci maddədə nəzərdə tutulan əsaslardan biri və ya bir neçəsi mövcud olduqda, vətəndaş həmin obyektin sənədləşdirilməsi ilə bağlı müvafiq icra hakimiyyəti orqanına - Əmlak Məsələləri Dövlət Xidməti yanında Daşınmaz Əmlakın Reyestri və Kadastrı Publik Hüquqi Şəxsin ərazi idarəsinə müraciət edir. Müraciətə müəyyən edilmiş müddətdə baxılır və təqdim olunan sənədlər yoxlanıldıqdan sonra daşınmaz əmlakın dövlət qeydiyyatı aparılı".

Ekspert bildirib ki, ikinci əsas məsələ Şəhərsalma və Tikinti Məcəlləsinin tələblərinə uyğun şəkildə inşa edilmiş, məlumatlandırma icraatı qaydasına aid olan və ya çoxmənzilli binadan alınmış mənzillərin qeydiyyatı prosesidir:

"Əgər tikinti və müvafiq icazələrin alınması qanunvericilikdə nəzərdə tutulmuş qaydalara uyğun həyata keçirilibsə, vətəndaş müraciət edərək həmin daşınmaz əmlaka sənəd ala bilər. Bu hallar istisna olmaqla, Azərbaycanda daşınmaz əmlakın qeydiyyatı prosesi, təəssüf ki, mümkün deyil. Belə hallar aşkar olunduqda isə inzibati orqanın hərəkəti və ya hərəkətsizliyi ilə bağlı vətəndaş məhkəməyə müraciət edərək məhkəmə qaydasında qeydiyyat prosesinin həyata keçirilməsini tələb edə bilər".

Röyalə Xəyal

Telegramda izləyin