İçərişəhərdə utancverici mənzərə: Sosial şəbəkələrdə etiraz doğuran problem - VİDEO

İçərişəhərdə tarixi binaların divarlarına müxtəlif yazıların yazılması sosial şəbəkələrdə narazılığa səbəb olub.

Yayılan görüntülərdə tarixi binaların üzərinə adların və müxtəlif ifadələrin həkk edildiyi görünür. Bəzi yazıların kifayət qədər böyük olması isə tarixi tikililərin görünüşünü açıq şəkildə korlayır.

Baku Tv-nin əməkdaşının həmin ərazidən hazırladığı reportajı təqdim edirik:

İçərişəhər Azərbaycanın tarix və memarlıq baxımından ən qiymətli məkanlarından biridir. 22 hektar ərazini əhatə edən İçərişəhər 1977-ci ildə tarix-memarlıq qoruğu statusu alıb, 1985-ci ildə isə dövlət tarix-memarlıq qoruğu elan edilib.

İçərişəhər Qız qalası və Şirvanşahlar Sarayı kompleksi ilə birlikdə 2000-ci ildə UNESCO-nun Ümumdünya İrs Siyahısına daxil edilib. Bu səbəbdən tarixi tikililərin divarlarına yazı yazılması və abidələrin digər formada zədələnməsi sadəcə estetik problem deyil, həm də tarixi irsin qorunması məsələsidir.

Qeyd edək ki, tarix və mədəniyyət abidələrinin qorunması Azərbaycan qanunvericiliyinin tələblərindəndir. Abidənin görünüşünün qəsdən korlanması və ya ona zərər vurulması konkret halın hüquqi qiymətləndirilməsindən asılı olaraq məsuliyyət yarada bilər./Oxu.az

Telegramda izləyin