Abituriyentlərin NƏZƏRİNƏ: İxtisas seçimində bunlara diqqət etməlisiniz

Aşağı bal toplayan abituriyentlər üçün ixtisas seçimi mərhələsi daha diqqətli yanaşma tələb edir. Bu zaman yalnız əvvəlki illərin keçid ballarına baxmaq kifayət etmir, çünki keçid balı hər il həmin ixtisas üzrə plan yerləri, müsabiqədə iştirak edənlərin sayı və nəticələrindən asılı olaraq formalaşır.

Bəs, aşağı bal toplayan abituriyentlər universitet və ixtisas seçərkən hansı meyarlara üstünlük verməli, yalnız keçid balına əsaslanmaq əvəzinə gələcək karyera imkanlarını və şəxsi maraqlarını necə nəzərə almalıdırlar?
Məsələ ilə bağlı Sonxeber.az-a açıqlama verən təhsil eksperti Qoşqar Məhərrəmov bildirib ki, keçid balı meyarlardan sadəcə biridir. Burada Dövlət İmtahan Mərkəzinin hesabatlarında, rəsmi elanlarında və Məleykə xanımın iclaslarında səsləndirilən fikirlərə də diqqət yetirmək lazımdır.

"Əgər aşağı bal toplayanların sayı çoxdursa, bu, həmin ballar üzrə rəqabətin daha yüksək olacağı və balların yuxarı qalxacağı anlamına gəlir. Əgər aşağı bal toplayanların sayı azdırsa, rəqabət də az olacaq və ballar aşağı düşə bilər. Hazırda Dövlət İmtahan Mərkəzinin qeydlərində yüksək bal toplayanların sayının az olduğu qeyd olunur. Bu səbəbdən 500-600 bal toplayanlar arasında rəqabətin daha az olacağı və balların müəyyən qədər aşağı düşə biləcəyi gözlənilir. Aşağı bal toplayanlar arasında isə rəqabətin daha çox olacağı ehtimal edilir".

Ekspert bildirib ki, bu baxımdan ixtisas seçimi zamanı bunu nəzərə almaq lazımdır:

"Şagirdlər öz ballarından təxminən 50-100 bal aşağı olan ixtisasları da seçimlərinə daxil etməlidirlər. Məsələn, topladığı baldan 50-70 bal aşağı keçid balı olan yerləri yazmaq qəbulolma şansını artıra bilər. Mənim ümumi tövsiyəm isə ondan ibarətdir ki, 100-150 və ya 200 balla təsadüfi bir ixtisasa qəbul olmaqdansa, yenidən hazırlaşıb 500-600 bal toplamaq və istədiyi ixtisasa qəbul olmaq daha yaxşı qərardır. Yəni "hara düşsəm, ora" məntiqi ilə hər hansı ali təhsil müəssisəsinə getməkdənsə, məqsədli şəkildə hazırlaşıb istənilən ixtisasa qəbul olmaq daha məqsədəuyğundur".

Röyalə Xəyal

Telegramda izləyin