Valideynlərə XƏBƏRDARLIQ: Bu məhsulların qiyməti BAHALAŞDI

Yeni tədris ili yaxınlaşdıqca məktəbli geyimləri, çanta, dəftərxana ləvazimatları və digər məktəb məhsullarına tələbatın artması qiymət məsələsini yenidən gündəmə gətirir. Valideynlərin qarşıdakı həftələrdə daha böyük xərclərlə üzləşə biləcəyi ilə bağlı narahatlıqlar da artır.

Bəs, məktəb alış-verişində qiymət artımına hansı iqtisadi və bazar amilləri təsir edir və avqust-sentyabr aylarında qiymətlərin daha da yüksəlməsi gözlənilirmi?
Məsələ ilə bağlı Sonxeber.az-a açıqlama verən iqtisadçı ekspert Natiq Cəfərli bildirib ki, Azərbaycan sadalanan məktəb ləvazimatlarının, demək olar ki, heç birini istehsal etmir.

"Bu sahədə əsasən idxaldan asılıyıq və məhsulların böyük hissəsi xaricdən gətirilir. Hətta yerli istehsal olunan məktəbli geyimlərinin materialları və parçaları da xaricdən idxal edilir. Hazırda dünyada da inflyasiya prosesi gedir və logistika xərcləri bahalaşıb. Azərbaycanda da inflyasiya 6-7 faizə yaxınlaşır, ərzaq inflyasiyası isə ən azı bu səviyyələrdədir. Buna görə digər sahələrdə də qiymət artımı təbii olaraq baş verir".

Ekspert bildirib ki, məktəb ləvazimatlarının qiymətlərində də məktəblər başlayana qədər bahalaşma dalğasının davam edəcəyini gözləmək olar:

"Daha sonra tələbin azalması ilə qiymət artımı müəyyən qədər səngiyə bilər. Hazırda isə tələb yüksək olduğundan qiymətlərin artmasını müşahidə edirik və çox güman ki, bu proses sentyabr ayı boyunca da davam edəcək".

Röyalə Xəyal

Telegramda izləyin