Avtomobilini qarajda park edənlərə XƏBƏRDARLIQ - Ciddi TƏHLÜKƏ

Fövqəladə Hallar Nazirliyi (FHN) qarajlarda avtomobillərin park edilməsi ilə bağlı xəbərdarlıq edib. Bu xəbərdarlıq nəqliyyat vasitələrində yanğın təhlükəsizliyi məsələsini yenidən gündəmə gətirib. Xüsusilə yanacaq sistemində sızma və elektrik nasazlığı olan avtomobillərin qapalı məkanlarda saxlanılması ciddi risklər yarada bilər.

Bəs, bu cür nasazlıqlar avtomobildə hansı təhlükələri yaradır, sürücü onları əvvəlcədən hansı əlamətlərdən müəyyən edə bilər və yanğın riskinin qarşısını almaq üçün hansı tədbirlər görülməlidir?
Məsələ ilə bağlı Sonxeber.az-a açıqlama verən avtomobil eksperti Razil Nağıyev bildirib ki, yanacaq sistemində sızma və ya elektrik nasazlığı olan avtomobillərin qapalı qarajlarda saxlanılması ciddi yanğın və partlayış təhlükəsi yarada bilər.

"Yanacaq sistemində sızma zamanı əsas təhlükə yalnız yanacağın özü deyil, həm də onun buxarlarının qaraj daxilində toplanmasıdır. Xüsusilə qapalı və havalandırması zəif olan qarajlarda risk daha yüksəkdir. Yanacaq sızması ilə elektrik nasazlığının eyni avtomobildə mövcud olması isə təhlükəni daha da artırır. Avtomobil sahibləri belə riskləri əvvəlcədən müəyyən etmək üçün avtomobili qaraja daxil etməzdən əvvəl sadə vizual və texniki yoxlama aparmalıdırlar. Avtomobilin altında yanacaq və ya digər maye izlərinin olması təhlükə əlaməti hesab edilə bilər".

Ekspert bildirib ki, bu əlamətlərdən hər hansı biri aşkar edildikdə avtomobilin qarajda saxlanılması məqsədəuyğun deyil:

"Avtomobil təhlükəsiz ərazidə saxlanılmalı, texniki baxışdan keçirilməli və nasazlıq aradan qaldırıldıqdan sonra qaraja daxil edilməlidir. Bundan əlavə, qarajlarda avtomobillərin park edilməsi zamanı yanğınsöndürmə texnikasının əraziyə maneəsiz daxil olmasını təmin etmək, keçid yollarını bağlamamaq və avtomobillər arasında təhlükəsiz məsafəni qorumaq vacibdir".

Röyalə Xəyal

Telegramda izləyin