Naxçıvanda enerji istehsalının imkanları genişlənir

Azərbaycan regionda karbohidrogenlər baxımından aparıcı rola malikdir. Eyni zamanda, beynəlxalq enerji təhlükəsizliyinin təmin olunmasında da fəal oyunçulardandır. Ona görə Naxçıvanda günəş və külək elektrik stansiyalarının fəaliyyəti, bu istiqamətdə görülən işlər və Azərbaycanda bərpa olunan enerjinin inkişaf etdirilməsi istiqamətində atılan addımlar Azərbaycanın enerji hasilatı baxımından aktiv fəaliyyətini göstərir.

Azərbaycan ekologiyanın və ətraf mühitin qorunması istiqamətində də əməli addımlarını nümayiş etdirir. Çünki Azərbaycan ətraf mühitin qorunması, ekologiyanın və bioloji müxtəlifliyin saxlanılması istiqamətində də fəal iştirakçılardandır. 2019-cu ildən bu yana yaşıl enerjinin inkişafı istiqamətində atılan addımlar da bu baxımdan önəmli sayılır. Naxçıvan bölgəsi uzun müddət enerji baxımından müəyyən çətinliklər yaşayıb. Bu çətinliklər tədricən müxtəlif layihələrin həyata keçirilməsi ilə aradan qaldırılmaqdadır.

Son illər Naxçıvanda görülən işlər bölgənin əhəmiyyətini, o cümlədən regional əhəmiyyətini artırır. Gələcəkdə Naxçıvan təkcə Cənubi Qafqazın deyil, həm də beynəlxalq və qlobal miqyasda öz əhəmiyyətini artıracaq. Xüsusilə Zəngəzur layihəsi fəaliyyətə keçdikdən və istifadəyə verildikdən sonra bu əhəmiyyət daha da güclənəcək.
Avqustun 11-də Naxçıvan Muxtar Respublikasına səfəri çərçivəsində Azərbaycan Prezidenti İlham Əliyev bölgədə nəzərdə tutulan işlərlə bağlı Azərbaycan Televiziyasına müsahibə verib.
AzTV-yə müsahibəsində ölkə başçısı bu gün Azərbaycanın regionda elektrik enerjisi ilə problemi olmayan nadir ölkə olduğunu bildirib. "Çünki bu və ya digər səbəblər üzündən bölgəmizdə enerji böhranı yaşanmaqdadır və bu böhran dərinləşə bilər. Həm bölgəmizdə gedən müharibələr, həm artan risklər, enerji daşıyıcılarının nəqli ilə bağlı nəqliyyat zəncirlərinin qırılması və digər amillər. İstisna edilmir ki, gələcəkdə yeni xoşagəlməz hadisələr baş verməsin", - deyə dövlətimizin başçısı vurğulayıb.
Hazırda Naxçıvanda Günəş enerjisinin potensialı çox böyükdür. Aparılan monitorinq və dəqiq təhlil əsasında Günəş elektrik enerjisinin istehsalı üçün Azərbaycan ərazisində ən əlverişli məkan Naxçıvandır. Artıq Naxçıvanda yüzlərlə meqavat gücündə Günəş elektrik stansiyalarının inşa ediləcəyi 600 hektardan çox ərazi müəyyən edilib. "Qonşu ölkələrə ixrac imkanlarımızı genişləndirərək biz, eyni zamanda, Avropa bazarına da çıxacağıq. Çünki biz indi Avropaya neftimizlə, qazımızla çıxmışıq. Ancaq biz elektrik enerjisi ilə də çıxmaq istəyirik", - deyə dövlətimizin başçısı qeyd edib.
Bu baxımdan Naxçıvanın bütün istiqamətlərdə, o cümlədən enerji təhlükəsizliyi məsələsində inkişafı rəsmi Bakı üçün strateji əhəmiyyət daşıyır. Naxçıvan əvvəllər enerji məsələlərində müəyyən asılılıqlara malik idi. Yeni layihələrin işə düşməsi və gələcəkdə bu istiqamətdə fəaliyyətin genişləndirilməsi Naxçıvanın həm enerji istehsal edən bölgəyə, həm də enerji daşıyıcısı və enerji qovşağına çevrilməsi imkanlarını artırır.

Aysel Mənsimova - politoloq

Telegramda izləyin