"Naxçıvan Şərqi Zəngəzur və Qarabağ iqtisadi rayonlarında həyata keçirilən inkişaf konsepsiyasına uyğun şəkildə yenidən qurulur" - AÇIQLAMA

Aqustun 11-də Azərbaycan Respublikasının Prezidenti İlham Əliyev və birinci xanım Mehriban Əliyeva Naxçıvan Muxtar Respublikasına səfər edib.Bu, dövlət başçısının prezident kimi Naxçıvana 17-ci səfəri idi.Səfər çərçivəsində bir sıra mühüm açılış və təməlqoyma mərasimləri keçirilib.

Mövzu ilə bağlı Sonxeber.az-a danışan Milli Məclisin deputatı Azər Badamov səfərin detalları barədə öz fikirlərini bölüşüb.

O qeyd edib ki, 12 avqustda dövlət başçımızın imzaladığı sərəncamla Naxçıvanın sosial-iqtisadi inkişafına ayrılan 258 milyon manat vəsait muxtar respublikanın inkişafına və insanların rahat, firavan həyatının təmin olunmasına mühüm töhfə verəcək:

"11 avqustda Prezident İlham Əliyevin Naxçıvan Muxtar Respublikasına etdiyi 17-ci səfərin proqramı çox zəngin olub. Dövlət başçımız səfər çərçivəsində 50 meqavat gücündə olacaq "Şəms-1" və "Qərbi Üfüq" Günəş Elektrik Stansiyalarında aparılan tikinti işləri ilə tanış olub. Naxçıvanın 500-1000 meqavat günəş enerjisi potensialına malik olduğu qiymətləndirilir. Gələcəkdə isə 100 meqavat gücündə enerji saxlanc yarımstansiyasının inşası nəzərdə tutulur. Bu stansiya 26 min ton karbon emissiyasının qarşısını almaqla 12 milyon kubmetr qaza qənaət etməyə imkan verəcək
Prezident İlham Əliyevin təməlini qoyduğu Naxçıvan Sənaye Parkının 310 hektar ərazidə tikilməsi nəzərdə tutulur. Park müasir texnologiyalara əsaslanan rəqabətqabiliyyətli məhsulların istehsalına, sahibkarlığın dəstəklənməsinə, qeyri-neft sektorunun inkişafına və məşğulluq məsələlərinin həllinə imkan yaradacaq. Ümumiyyətlə, ölkədə istifadəyə verilmiş 8 sənaye parkında 21,4 milyard manatlıq məhsul istehsal olunub, o cümlədən 7,1 milyard manatlıq məhsul ixrac edilib və 11 500 daimi iş yeri yaradılıb. Respublikada böyüklüyünə görə ikinci olacaq Naxçıvan Sənaye Parkı ölkəmizin qeyri-neft sektorunda istehsalın və ixracın artırılmasında əhəmiyyətli rol oynayacaq".

Deputat hesab edir ki, yenidən qurulub bərpa olunan 194 kilometr uzunluğunda dəmir yolunun Zəngəzur dəhlizinə birləşdirilməsi Naxçıvanı mühüm tranzit nəqliyyat və logistika mərkəzinə çevirəcək. Bu isə Naxçıvana əlavə gəlirlərin gətirilməsinə və yeni iş yerlərinin açılmasına ciddi töhfə verəcək:

"Dövlət başçımız elektrik avtobusları və dəmir yolunda aparılan yenidənqurma işləri ilə də tanış olub. Belə ki, Naxçıvanın avtobus parkının BYD markalı elektrik avtobuslarla əvəzlənməsi sakinlərin rahat və təhlükəsiz hərəkətinin təmin olunmasına imkan verəcək".

Azər Badamov eyni zamanda xüsusi olaraq vurğulayıb ki, Əlahiddə Ümumqoşun Orduda yeni yaradılan Komando hərbi hissələri Naxçıvanın təhlükəsizliyini etibarlı şəkildə qoruyacaq. Ali Baş Komandanın yeni yaradılan komando hərbi hissələrinə döyüş bayraqlarını təqdim etməsi orduda vətənpərvərlik və döyüş ruhunun yüksəldilməsinə xidmət edir.
"Naxçıvanda açılışı olan DOST Mərkəzi əhaliyə 164 sosial xidmətin şəffaf və müasir şəkildə təqdim olunmasını təmin edəcək. Dövlət başçımızın təməlini qoyduğu Naxçıvan Mehmanxana Kompleksi də muxtar respublikanın turizm sektorunun inkişafına töhfə verəcək. Beşulduzlu olacaq bu hotel qonaqlara yüksək səviyyəli turizm xidmətləri təqdim edəcək".

"Naxçıvan şəhərinin 2044-cü ilədək yenidən qurulmasını nəzərdə tutan Baş Plan hazırlanıb. Dövlət başçımız şəhərin inkişafı ilə bağlı dəyərli tapşırıqlarını verib. Prezident İlham Əliyev və birinci xanım Mehriban Əliyeva Naxçıvan şəhərində Möminə Xatun türbəsində aparılan bərpa və konservasiya işləri ilə tanış olublar. Daha sonra "Əcəmi seyrangahı" istirahət kompleksində memar Əcəmi Naxçıvaninin abidəsinin açılışında iştirak ediblər. Bu, dövlətimizin tarixinə, mədəniyyətinə və tarixi şəxsiyyətlərimizin parlaq irsinə göstərdiyi diqqətin təzahürüdür. Bu layihələr, eyni zamanda, onların fəaliyyətinin və zəngin irsinin gələcək nəsillərə çatdırılması istiqamətində həyata keçirilən mühüm tədbirlərdir.

Naxçıvanda təməli qoyulan sosial evlər layihəsi muxtar respublikada mənzil probleminin güzəştli şərtlərlə həll olunmasına töhfə verəcək. Naxçıvanın sosial-iqtisadi inkişafına ayrılan vəsait həmçinin Naxçıvanda yolların, məktəblərin, universitet yataqxanasının və çoxmənzilli binaların yenidən qurulmasına və əsaslı təmirinə yönəldiləcək. Eyni zamanda, içməli və suvarma suyu məsələlərinin müasirləşdirilməsi, su elektrik stansiyalarının inşası və bir sıra digər yenidənqurma və bərpa işlərinin həyata keçirilməsi planlaşdırılır.
Bu, Naxçıvana investisiyaların sürətlə axmasına, yeni istehsal müəssisələrinin və iş yerlərinin yaranmasına, insanların həyat şəraitinin müasir standartlara uyğunlaşdırılmasına geniş imkanlar yaradacaq.
Həmçinin, Zəngəzur dəhlizinin açılması Naxçıvanın Şərqi Zəngəzurla birləşməsinə, bu marşrut üzrə ilkin mərhələdə 15 milyon ton yükün daşınmasına, enerji və rəqəmsal dəhlizlərin formalaşmasına yol açacaq. Nəticədə Naxçıvan Azərbaycanın strateji əhəmiyyətə malik ərazisi kimi Asiya ilə Avropa arasında yaradılan körpünün mühüm hissəsinə çevrilməklə, geoiqtisadi və geosiyasi baxımdan əhəmiyyətli region statusunu daha da möhkəmləndirəcək" deyə milllət vəkili fikrini yekunlaşdırıb.

Lalə Məmmədova

Telegramda izləyin