60 yaşdan yuxarı şəxslər bu səbəbdən BOŞANIR - AÇIQLAMA

Azərbaycanda son illərdə boşanmaların ümumi sayının artması ilə yanaşı, daha yaşlı şəxslər arasında da nikahların pozulması halları diqqət çəkir. Dövlət Statistika Komitəsinin məlumatlarında boşanmaların yaş qrupları üzrə ayrıca izlənildiyi və 2025-ci il üzrə də bu göstəricilərin təqdim edildiyi görünür.

Bəs, 60 yaşdan yuxarı şəxslərin daha gec yaşlarda boşanmaq qərarına gəlməsinə hansı sosial, ailəvi və psixoloji amillər təsir edir və bu tendensiyanın arxasında hansı səbəblər dayanır?
Məsələ ilə bağlı Sonxeber.az-a açıqlama verən sosioloq Hüseyn İbrahimov bildirib ki, əvvəllər yaş göstəricilərinə görə boşanma halları daha çox gənclər arasında və ya 35-40 yaş aralığında müşahidə edilirdi. Ancaq son dövrlərdə hətta 50-dən yuxarı, bəzi hallarda isə 60-dan yuxarı yaşlarda da boşanma hallarına rast gəlinir.

"Bunu yalnız sosial amillərlə əlaqələndirmək olmaz. Daha çox insanların həyat tərzi və dünyagörüşü, onlayn və xüsusilə sosial şəbəkələrdən istifadə, həmçinin həyat tərzinin müəyyən yaş aralığında kəskin şəkildə dəyişməsi ilə əlaqələndirmək olar. Çox zaman müasirləşmə və modernləşmə istəyi gənclər arasında ziddiyyətlər yaratdığı kimi, insanın dünyagörüşü və həyat tərzinin ailə mühitində birtərəfli şəkildə dəyişməsi və ya yeni həyata uyğunlaşması da ailədaxili ziddiyyətlərə səbəb ola bilər. Bu proses birtərəfli və harmonik getmədikdə, tərəflər arasında fikir ayrılıqları yaranır".

Sosioloq bildirib ki, ailə münasibətləri həm də kişi və qadının sosiallaşdığı bir institutdur:

"Bu sosiallaşma istənilən yaş həddində pozula bilər. Sosiallaşma bir tərəfdən cəmiyyətdə insanlar və fərdlər arasında, digər tərəfdən isə ailə daxilində, uşaqlar və valideynlər arasında baş verir. Qeyd etdiyimiz yaş qrupunda boşanmaların səbəblərindən biri də tərəflərdən hər hansı birinin - kişinin və ya qadının - sosiallaşma baxımından digərindən kəskin şəkildə fərqlənməsidir".

Onun sözlərinə görə, dünyagörüşü, həyat tərzi, həyata baxış və bir-birinə münasibətdə yaranan kəskin ziddiyyətlər ailədaxili sosiallaşmada problemlərə səbəb olur:

"Bu da tərəflərin bir yerdə yaşamasını və rahat həyat sürməsini çətinləşdirir. Nəticədə, tərəflər arasında yaranan mübahisə və konfliktlər fonunda onlar boşanma qərarına gələ bilirlər".

Röyalə Xəyal

Telegramda izləyin