İmplant diş nədir və kimlər üçün uyğundur? - Gözəl gülüş neçəyə başa gəlir?

Aparılmış araşdırmalara görə istənilən, hətta qeyri-səmimi mimika belə, stressin öhdəsindən gəlməkdə sizə kömək edə bilər. Elə buna görə də, mümkün qədər tez-tez, hətta sevindirici bir şey olmasa belə,gülümsəyin. Üzünüzdə təbəssüm yaratmağa cəhd edin. Bu sizə xoşbəxtlik bəxş edəcəkdir. Gözəl təbəssümün əsas dayaqlarından biri sağlam dişlərdir. Bəs sağlam təbəssümə sahib ola bilmək üçün dişlərimizi necə qorumalıyıq?.
Təbəssüm naminə implant: zərurət, yoxsa dəb?

İmplant diş nədir və kimlər üçün uyğundur? İmplantın uğursuz olmasına nə səbəb ola bilər? Gözəl gülüş neçəyə başa gəlir? Mütəxəssis araşdırması etmişik.

Sonxeber.az-a danışan tibb üzrə fəlsəfə doktoru, ağız və üz-çənə cərrahı Hüseyn Hüseynzadə mövzu ilə bağlı bütün suallarımızı cavablandırıb.

Hüseyn Hüseynzadə bildirib ki, müasir stomatologiyanın ən doğru seçimlərində bəyənilən biri də məhz dental implantasiyadır:

"Belə ki, itirilmiş dişləri bərpa etmək üçün sağlam dişlərə toxunmadan biz boşluqlara dental implant yerləşdiririk və bu da həm estetik, həm funksional tərəfdən bizə yeni gülüşə sahib olmağa zəmin yaradır. Dental implantlar artıq dünya stomatologiyasında 50 ildən çoxdur aktiv istifadə olunur, dünyada 200-dən çox implant markası var. Azərbaycanda da təqribi 20-yə yaxın implant markası var və çox yüksək ixtisaslı dental implantasiya ilə məşğul olan stomatoloqlar vardır. Dental implantlar özləri titan(II) oksid metalından hazırlanır, orqanizmə ən yaxın və demək olar ki, allergik reaksiyası olmayan bir metaldır. Dental implantları 17 yaşdan yuxarı sağlamlığı icazə verən hər bir şəxsə etmək olar. Mənim 80 yaşında pasiyentim də olub, mən ona dental implant yerləşdirmişəm".

Kimlərə implant olmaz?

Stomatoloq vurğulayıb ki, hamilə qadınlar, süd verən analar, onkoloji xəstəliyi olanlar və implant olacaq nahiyədə hər hansı bir iltihabi proses, kista və digər xoşxassəli və yaxud da bədxassəli şiş olan insanlardan başqa hər kəsə dental implant icra etmək olar:

"Dental implantların uğursuzluğu səhv aparılmış diaqnostika, düzgün ölçmələr olmadıqda, və yaxud da əməliyyat zamanı baş verə biləcək ağırlaşmalardan yarana bilər. Amma statistikaya görə əməliyyat zamanı uğursuz əməliyyatın nəticəsi çox aşağıdır.İmplantın itirilmə müddəti üzərinə qapaq düzəldəndən sonra olur, o da texniki problemlərdən yarana bilər. Və yaxud da pasiyentlər ən çox vaxtlı-vaxtında müayinəyə getmirlər, hər 6 aydan bir diş daşlarını təmizləmirlər. İmplant olunandan sonra xüsusi diş duşları deyilən irriqatorlardan istifadə etmirlər, D vitamini səviyyəsini kontrolda saxlamırlar. Bu da implantın düşməsinə səbəb ola bilər".

İmplant neçəyə başa gəlir?

Cərrah qiymətlərdən danışdı:

"Dental implantlar ölkəmizdə 450 manatdan 2500 manata qədər dəyişir. Bu əsasən implant markasına görə, istehsalçı ölkəyə görə dəyişir və təbii ki, klinika avadanlıqlarının qiyməti, müasir avadanlıqlar və rəqəmsal texnologiyadan istifadə və sair bunlar qiyməti artırır . Əfsuslar olsun ki, ölkəmizdə diplomsuz stomatoloq kimi çalışan insanlar çoxdur və bu da bazarda çox böyük fərq yaradır, qiymət baxımından fərq yaratdığı üçün insanların beynində sual yaranır".

Lalə Məmmədova

Telegramda izləyin