Çoxmənzilli binalarda mənzilə necə çıxarış alınır? - AÇIQLAMA

Çoxmənzilli binalarda mənzil alan vətəndaşların qarşılaşdığı əsas məsələlərdən biri də əmlaka çıxarışın əldə olunmasıdır.

Mənzilin alqı-satqısının rəsmiləşdirilməsi ilə yanaşı, onun hüquqi statusunun təsdiqlənməsi və çıxarışın alınması da mühüm əhəmiyyət daşıyır.

Bəs çoxmənzilli binalarda mənzilə çıxarış almaq üçün hansı sənədlər tələb olunur, proses necə həyata keçirilir və hansı hallarda vətəndaşlar çətinliklərlə üzləşirlər?

Mövzu ilə bağlı əmlak məsələləri üzre ekspert Fərid Cəfərli Sonxeber.az -a açıqlama verib:

"Çoxmənzilli binalarda mənzilə çıxarışın alınması üçün ilk növbədə binanın hüquqi statusu və istismara qəbul edilməsi məsələsi müəyyənləşdirilməlidir. Çünki mənzil üzərində mülkiyyət hüququnun dövlət qeydiyyatına alınması üçün yalnız alıcının əlində olan müqavilənin mövcudluğu kifayət etmir; binanın özünün də qanunvericiliyin tələblərinə uyğun olaraq rəsmiləşdirilməsi vacibdir.

Əgər bina mənzil-tikinti kooperativi, yəni MTK tərəfindən inşa olunubsa və bina istismara qəbul edilibsə, əsas sənədlər sırasında mənzilin verilməsi barədə MTK üzvlərinin ümumi yığıncağının qərarı və mənzil üzrə pay haqqının tam ödənildiyini təsdiq edən maliyyə arayışı xüsusi əhəmiyyət daşıyır. Bundan əlavə, ərizəçinin şəxsiyyətini təsdiq edən sənədi və dövlət rüsumunun ödənilməsi barədə sənəd təqdim edilir. Rəsmi məlumatlara görə, MTK binasının istismara qəbul aktının və ya istismara icazə sənədinin olması da mühüm şərtdir.

Əgər çoxmənzilli bina MTK yaradılmadan hüquqi və ya fiziki şəxs tərəfindən inşa edilibsə, bu halda mənzilə hüquqi əsasın notariat qaydasında təsdiq edilmiş müqavilə ilə rəsmiləşdirilməsi tələb olunur. Bununla yanaşı, binanın istismara qəbul edilməsi haqqında müvafiq sənəd, şəxsiyyəti təsdiq edən sənəd və dövlət rüsumunun ödənilməsini təsdiq edən sənəd təqdim edilir.

Vətəndaş mənzil alarkən yalnız müqavilənin olub-olmamasına deyil, binanın istismara qəbul edilib-edilməməsinə, MTK-nın və ya tikinti şirkətinin təqdim etdiyi sənədlərin hüquqi əsaslarına və mənzilin maliyyə öhdəliklərinin tam yerinə yetirilməsinə də diqqət yetirməlidir".

Telegramda izləyin