Toy mərasimlərində bu qidalara DİQQƏT EDİN - AÇIQLAMA

Toy və digər kütləvi tədbirlərdə çox sayda yeməyin əvvəlcədən hazırlanması, uzun müddət süfrədə saxlanılması və isti havalarda temperatur rejiminin pozulması qida zəhərlənməsi riskini artıra bilər.

Bəs, toy və kütləvi tədbirlərdə qida zəhərlənmələrinin qarşısını almaq üçün yeməklərin hazırlanması, daşınması və saxlanılması zamanı hansı qaydalara əməl edilməlidir, eyni vaxtda bir neçə şəxsdə zəhərlənmə əlamətləri yarandıqda hansı qidalardan şübhələnmək və ilk növbədə hansı tədbirləri görmək lazımdır?
Mövzu ilə bağlı Sonxeber.az-a açıqlama verən qida eksperti Fərid Səfərov bildirib ki, toy və digər kütləvi tədbirlərdə qida zəhərlənməsi riskinin əsas səbəbləri qidanın düzgün hazırlanması, saxlanması və temperatur rejiminin pozulması ilə bağlı ola bilər. Xüsusilə çox sayda insana eyni yeməyin təqdim edildiyi tədbirlərdə qida təhlükəsizliyi qaydalarına daha ciddi əməl olunmalıdır.

"Ən vacib məqam çiy və hazır qidaların bir-birindən ayrılmasıdır. Çiy ət, toyuq və yumurta ilə təmas edən bıçaq, doğrama taxtası və digər avadanlıqlar hazır salat və yeməklərdə istifadə edilməməlidir. Ət və digər məhsullar kifayət qədər istilikdə bişirilməli, bişmiş yeməklər isə otaq temperaturunda uzun müddət saxlanılmamalıdır. Xüsusilə mayonezli salatlar, kremli şirniyyatlar, ət və toyuq yeməkləri, yumurtalı məhsullar, süd məhsulları, dəniz məhsulları və düyü ilə hazırlanan yeməklər temperaturun düzgün saxlanılmadığı halda riskli ola bilər. Soyuq saxlanmalı məhsulların temperaturu ümumilikdə 5°C-dən aşağı, isti təqdim olunan yeməklərin isə 60°C-dən yuxarı saxlanması tövsiyə olunur. Hazır yeməklər mümkün qədər qısa müddətdə istehlak edilməli və dəfələrlə qızdırılıb-soyudulmamalıdır".

Ekspert bildirib ki, əgər toyda eyni vaxtda bir neçə nəfərdə ürəkbulanma, qusma, ishal, qarın ağrısı və ya halsızlıq kimi oxşar əlamətlər yaranırsa, qida mənşəli xəstəliyə şübhə etmək lazımdır:

"Bu halda həmin şəxslərin hansı yeməklərdən və nə vaxt istifadə etdiyini müəyyənləşdirmək çox vacibdir. Şübhəli qidaların qalan hissəsi atılmamalı, mümkün olduğu qədər ayrıca saxlanılaraq aidiyyəti qurumlara təqdim edilməlidir. İlk növbədə xəstələrin vəziyyəti qiymətləndirilməli, xüsusilə güclü qusma, qanlı ishal, yüksək hərarət, huşda dəyişiklik və ya ciddi susuzlaşma əlamətləri varsa, təcili tibbi yardım çağırılmalıdır. Qusma və ishal zamanı əsas risklərdən biri maye və elektrolit itkisi olduğundan, şüuru yerində olan şəxslərə kiçik qurtumlarla maye və oral rehidratasiya məhlulu verilə bilər. Özbaşına antibiotik və ishalı dayandıran dərmanlardan istifadə etmək isə düzgün deyil".

Onun sözlərinə görə, belə hallarda yalnız xəstələrin müalicəsi deyil, zəhərlənmənin mənbəyinin müəyyənləşdirilməsi və digər insanların həmin qidadan istifadə etməsinin qarşısının alınması da vacibdir:

"Kütləvi tədbirlərdə qidaların hazırlanması və paylanması peşəkar, gigiyena və temperatur tələblərinə əməl edən iaşə xidməti tərəfindən həyata keçirilməlidir".

Röyalə Xəyal

Telegramda izləyin