Kirayə qiymətlərinin yüksəlməsinin əsas səbəbi nədir? - AÇIQLAMA

Bakıda kirayə mənzil bazarında qiymət artımı yenidən gündəmdədir.

Xüsusilə sentyabr ayının yaxınlaşması ilə tələbələrin paytaxta qayıtması və yeni qəbul olunanların mənzil axtarışına başlaması kirayə evlərə tələbi artırır.

Bəs bu dövrdə kirayə qiymətlərinin yüksəlməsinin əsas səbəbi nədir? Tələbə axını bazara nə qədər təsir edir və qiymət artımının qarşısını almaq üçün hansı addımlar atıla bilər?

Əmlak məsələləri üzrə ekspert Fərid Cəfərli bu barədə Sonxeber.az -a açıqlama verib:

"Kirayə bazarında xüsusilə avqustun ikinci yarısı və sentyabr ayı fərqli dövrdür. Tələbələr Bakıya qayıdır, yeni qəbul olunan tələbələr şəhərə gəlir, valideynlər eyni vaxtda mənzil axtarmağa başlayırlar. Beləliklə, qısa müddət ərzində bazara böyük həcmdə əlavə tələb daxil olur.Məsələn, hazırkı bazar qiymətləndirmələrində tələbələrin daha çox 500-700 manat civarında olan mənzillərə üstünlük verdiyi, metro və universitetlərə yaxın ərazilərdə isə qiymətlərin daha yüksək olduğu göstərilir.- Burada bazar psixologiyası da mühüm rol oynayır. Ev sahibi görür ki, sentyabr yaxınlaşır, mənzilə tələbat artır və alternativ kirayəçi tapmaq daha asandır. Bu zaman onun qiyməti yüksəltmək imkanı yaranır.Tələbə yataqxanalarının artırılması, mövcud yataqxanaların yenilənməsi və universitetlərin ətrafında tələbələr üçün daha əlçatan yaşayış fondunun yaradılması kirayə bazarındakı təzyiqi əhəmiyyətli dərəcədə azalda bilər.

Bu, yalnız tələbə məsələsi deyil. Eyni zamanda şəhər planlaşdırılması və sosial mənzil siyasəti məsələsidir.- Ən real çıxış yollarından biri mənzili bir neçə tələbənin paylaşmasıdır. İkincisi, metroya birbaşa yaxınlıqdan bir qədər uzaq ərazilərə baxmaqdır.

Çünki tələbə üçün mənzilin qiyməti ilə yanaşı, nəqliyyat xərcini və yolda itirilən vaxtı da hesablamaq lazımdır".

Telegramda izləyin