Ev sahibi kirayəçinin razılığı olmadan mənzilə daxil ola bilərmi? - AÇIQLAMA

Kirayə münasibətlərində tərəflərin hüquq və vəzifələri ilə bağlı mübahisəli məqamlar kifayət qədər çoxdur. Xüsusilə mənzil sahibinin kirayəçinin yaşadığı evə hansı hallarda daxil ola bilməsi məsələsi tez-tez sual doğurur.

Bəzi hallarda ev sahibləri mənzilin özlərinə məxsus olduğunu əsas gətirərək kirayəçinin razılığı olmadan evə daxil olmağı mümkün hesab edirlər.

Bəs qanun bu məsələyə necə yanaşır? Ev sahibi kirayəçinin razılığı olmadan mənzilə daxil ola bilərmi?

Hüquqşünas Xanım Yusifova bu barədə Sonxeber.az -a açıqlama verib:

"Kirayə müqaviləsi bağlanaraq mənzil kirayəçinin istifadəsinə verildiyi andan etibarən ev sahibinin həmin mənzil üzərində mülkiyyət hüququnun qalması onun mənzilə istədiyi vaxt və istədiyi formada daxil olmaq hüququnun olduğu anlamına gəlmir. Kirayəçinin mənzildən qanuni əsaslarla istifadə etdiyi müddətdə onun yaşayış sahəsinə müdaxilə edilməməsi təmin olunmalıdır.

Ümumi qayda olaraq, ev sahibi mənzilə daxil olmaq istəyirsə, bunu kirayəçi ilə əvvəlcədən razılaşdırmalıdır. Xüsusilə mənzil kirayəçinin faktiki yaşayış yeri olduğu halda, onun razılığı olmadan mənzilə daxil olmaq mübahisə və hüquqi məsuliyyət məsələsi yarada bilər.

Lakin burada müəyyən istisnalar da nəzərə alınmalıdır. Məsələn, mənzildə qəza baş veribsə, su sızması, yanğın və ya digər təxirəsalınmaz vəziyyət yaranıbsa və zərərin qarşısını almaq üçün dərhal müdaxilə zəruridirsə, vəziyyətdən asılı olaraq mənzilə giriş məsələsi fərqli qiymətləndirilə bilər.

Bundan başqa, tərəflər arasında bağlanmış kirayə müqaviləsinin şərtləri də mühüm əhəmiyyət daşıyır. Müqavilədə mənzilin yoxlanılması, təmir işlərinin aparılması və digər hallarda ev sahibinin əvvəlcədən xəbərdarlıq etməklə mənzilə daxil olması ilə bağlı şərtlər müəyyən edilə bilər.

Əgər ev sahibi kirayəçinin razılığı olmadan, heç bir əsas olmadan və müqavilənin şərtlərini nəzərə almadan mənzilə daxil olursa, kirayəçi öz hüquqlarının pozulduğunu hesab etdiyi halda müvafiq hüquqi müdafiə vasitələrindən istifadə edə bilər. Mübahisənin konkret hüquqi qiymətləndirilməsi isə hadisənin necə baş verdiyindən, müqavilənin məzmunundan və digər hallardan asılıdır".

Telegramda izləyin