İmtahana gecikən namizəd yalınayaq qaçdı, amma içəri buraxılmadı - VİDEO

Türkiyədə Dövlət Qulluğu üzrə Personal Seçim İmtahanının (2026-KPSS) bakalavr səviyyəsi üzrə Ümumi Bacarıqlar-Ümumi Mədəniyyət sessiyası keçirilib.

Sonxeber.az xarici mediaya istinadla xəbər verir ki, imtahan günlərində tez-tez rast gəlinən görüntülər bu dəfə də yaşanıb. İmtahana gecikən namizədlərdən biri başmaqlarını əlinə alaraq məktəbə qədər yalınayaq qaçıb. Lakin bütün səylərinə baxmayaraq, imtahana yetişə bilməyib. Məktəbin qarşısında gözləyən vətəndaşlardan birinin "Heyif oldu, doğrudan çox üzüldüm" deməsi üzərinə namizəd "İdman oldu" deyə cavab verib. Həmin anlar vətəndaşlardan birinin mobil telefon kamerasına düşüb.

Türkiyənin Ölçmə, Seçmə və Yerləşdirmə Mərkəzi (ÖSYM) tərəfindən təşkil olunan 2026-KPSS bakalavr imtahanının Ümumi Bacarıqlar-Ümumi Mədəniyyət sessiyasına 1 milyon 708 min 329 namizəd müraciət edib.

Türkiyənin 81 vilayəti və Lefkoşada 145 imtahan mərkəzində keçirilən KPSS-nin ilk sessiyası saat 10:15-də başlayıb. Namizədlər saat 10:00-dan sonra imtahan binalarına buraxılmayıb. 120 çoxseçimli sual üçün 130 dəqiqə cavablandırma vaxtının verildiyi sessiya saat 12:25-də başa çatıb.

İmtahana gecikən namizədlərdən biri imtahan verəcəyi məktəbin qapısına qədər yalınayaq qaçıb. Lakin qapıya çatdığı anda nəzarətçi əl işarəsi ilə onun içəri buraxılmayacağını bildirib. Qaçmaqdan nəfəsi kəsilən namizəd əlində tutduğu başmaqları geyinməkdə də çətinlik çəkib.

İmtahanın keçirildiyi məktəbin girişində imtahana girən yaxınını gözləyən qadın namizədə "Heyif oldu, doğrudan çox üzüldüm" deyib. Qaçmaqdan nəfəsi kəsilən və imtahanı buraxan namizəd isə qadına "İdman oldu, abla" cavabını verib.

Həmin anlar başqa bir vətəndaşın mobil telefon kamerası ilə qeydə alınıb.

Telegramda izləyin