Yollar təmirə bağlanır, tıxac artır: Sürücülər nə etməlidir?

Yolların təmirə bağlanması nəqliyyat axınının alternativ küçələrə yönəlməsinə və həmin ərazilərdə sıxlığın artmasına səbəb ola bilər. Belə məhdudiyyətlər zamanı avtobus marşrutlarının da hərəkət sxemləri dəyişdirilir və bəzi istiqamətlərdə intervallar arta bilər.

Bəs, təmir müddətində yaranan tıxacların sürücülərə və şəhərdaxili nəqliyyata təsirini azaltmaq üçün hansı tədbirlər görülməli, alternativ yolların və ictimai nəqliyyatın imkanlarından necə daha səmərəli istifadə olunmalıdır?
Mövzu ilə bağlı Sonxeber.az-a açıqlama verən nəqliyyat eksperti Yasin Mustafayev bildirib ki, yolların təmirə bağlanması hər zaman müəyyən çətinliklər yaradır və insanlar bundan əziyyət çəkirlər.

"Lakin təmir işləri başa çatdıqdan və yollar istifadəyə verildikdən sonra yaranan rahatlıq əvvəlki çətinlikləri müəyyən qədər unutdurur. Bu cür çətinliklər həmişə olub və bundan sonra da olacaq. Eyni zamanda, yolların təmiri də zəruri prosesdir. Təmir müddətində alternativ yollardan istifadə etməklə sıxlığın qarşısını mümkün qədər almaq lazımdır. İnsanların fərdi nəqliyyat vasitələrindən daha az istifadə etməsi də bu baxımdan əhəmiyyətlidir".

Ekspert bildirib ki, hazırda aparılan təmir işləri genişmiqyaslıdır və onların böyük hissəsinin sentyabrın 15-dək yekunlaşdırılması gözlənilir:

"Bu tarix məktəblərin açılması ilə də əlaqəlidir. Məktəblərin fəaliyyətə başlamasından sonra yollarda tıxac və sıxlığın daha da artacağı gözlənilir. Bununla yanaşı, metroda da müəyyən təmir və yenilənmə işləri aparılır. Hazırda "Nizami"-"28 May" stansiyaları arasında hərəkətin dayandırılması nəqliyyat sıxlığına daha ciddi təsir göstərə bilər. Yolların təmirinin böyük hissəsinin sentyabrın 15-dək başa çatdırılması gözlənildiyindən, əsas yükün metroda aparılan təmir işlərinin üzərinə düşəcəyi düşünülür".

Röyalə Xəyal

Telegramda izləyin