David Seliverstov: "Məni sındırmaq mümkün deyil - mən Allaha və dövlətimə güvənirəm" - MÜSAHİBƏ

"Bu gün haqqımda bəzi media nümayəndələri tərəfindən aparılan müzakirələri diqqətlə izlədim. Təəssüf hissi ilə qeyd edirəm ki, həmin müzakirələrdə jurnalistikanın əsas prinsiplərinə - obyektivliyə, tərəfsizliyə və peşəkarlığa əməl olunmadığını düşünürəm. Mənim barəmdə müxtəlif iddiaların araşdırılmadan, qarşı tərəfin mövqeyi öyrənilmədən və sübutlar təqdim edilmədən ictimaiyyətə çatdırılması yolverilməzdir".

Sonxeber.az xəbər verir ki, bunu "Magen David Azerbaijan" insan hüquqlarının müdafiəsi və xeyriyyəçilik cəmiyyətinin sədri David Seliverstov müsahibəsində bildirib.

Mən həmin şəxslərə və onların arxasında dayandığını düşündükləri qüvvələrə bir məsələni xatırlatmaq istəyirəm: heç kim özünü qanundan və məsuliyyətdən üstün hesab etməməlidir. Kiminsə müəyyən şəxslərə və ya dairələrə güvənməsi onun hüquqi məsuliyyətini aradan qaldırmır. Zaman hər şeyə öz qiymətini verir. Mən isə bütün məsələlərin qanun çərçivəsində araşdırılmasının tərəfdarıyam.
Bu günlər ərzində mənə qarşı müxtəlif hücumların olduğunu görürəm. Lakin bütün bunlara dözdüm və geri çəkilmədim. Əksinə, "Magen David" qalxanımızı daha da möhkəm qaldırmışıq. Məni sındırmaq mümkün deyil. Mən Allaha və dövlətimə güvənirəm.

Mən Azərbaycan dövlətinə bağlı, öz ölkəsini və Vətənini sevən bir insanam. Dövlətçilik və qanunun aliliyi mənim üçün fundamental dəyərlərdir. Azərbaycan Prezidentinin media və sosial şəbəkələrdə qanunçuluğun və məsuliyyətin təmin olunmasına yönəlmiş fərman və sərəncamlarının olduğunu nəzərə alaraq hesab edirəm ki, hər bir jurnalist ilk növbədə qanunlara və peşə etikası prinsiplərinə hörmət etməlidir.

Azad fikir ifadə etmək hüququ demokratik cəmiyyətin mühüm dəyəridir. Lakin azad fikir heç kimə başqa şəxsin şərəf və ləyaqətini alçaltmaq, təsdiqlənməmiş ittihamları fakt kimi təqdim etmək və ya dövlətçiliyə zərər vura biləcək məsuliyyətsiz məlumatlar yaymaq hüququ vermir.

Xüsusilə süni intellekt vasitəsilə insanların görüntülərinin dəyişdirilməsi, müxtəlif şəkillərin hazırlanaraq onların təhqir və nüfuzdan salınma məqsədilə mediada və sosial şəbəkələrdə yayılması ciddi məsələdir. Texnologiyanın imkanlarından istifadə etmək olar, amma bu imkanlardan insanın hüquq və ləyaqətinə qarşı istifadə edilməsi yolverilməzdir.

Bir neçə gün əvvəl sosial şəbəkədə və rəsmi müraciətlə Prezident Administrasiyasına, həmçinin Media və Yayım Şurasına müraciət etmişəm. Müraciətimin ardınca haqqımda "9-cu son, sənin üçün ağlayır" başlığı ilə material yayımlandı. Mən hesab edirəm ki, belə başlıq jurnalistikanın ciddiliyinə və peşəkar üsluba uyğun deyil. İnsan haqqında material hazırlayan jurnalist onunla bağlı məsələyə emosional və təhqiramiz ifadələrlə deyil, faktlar və sənədlər əsasında yanaşmalıdır.

Mənim üçün əsas məsələ şəxsi mübahisə deyil. Əsas məsələ jurnalistikanın məsuliyyətidir. Əgər bir insan haqqında ciddi ittiham səsləndirilirsə, bunun hüquqi və faktoloji əsası göstərilməlidir. İddia ilə faktı bir-birindən ayırmaq jurnalistikanın ən fundamental prinsiplərindəndir.

"Magen David Azerbaijan" İnsan Hüquqlarının Müdafiəsi və Xeyriyyəçilik Cəmiyyəti bundan sonra da öz fəaliyyətini davam etdirəcək. "Magen David" bizim üçün müqəddəs və mühüm simvoldur. Bu adın müxtəlif məqsədlərlə siyasi və ya dini qarşıdurma predmetinə çevrilməsinə cəhdləri qəbul etmirəm.
Azərbaycan tarixən müxtəlif xalqların və dini icmaların birgə yaşadığı ölkədir. Multikulturalizm və tolerantlıq Azərbaycan cəmiyyətinin mühüm dəyərlərindəndir. Hesab edirəm ki, bu dəyərləri qorumaq hər bir vətəndaşın, o cümlədən media nümayəndələrinin məsuliyyətidir.

Heç kim Azərbaycan cəmiyyətində milli və ya dini zəmində qarşıdurma yaratmağa çalışmamalıdır. Mən yəhudi olaraq da, Azərbaycan vətəndaşı olaraq da ölkəmin sabitliyinə, multikultural mühitinə və dövlətçiliyinə hörmətlə yanaşıram.
Harada olmağımızdan asılı olmayaraq, biz Azərbaycan dövlətinə və Prezident İlham Əliyevin rəhbərliyi ilə həyata keçirilən dövlət siyasətinə hörmətlə yanaşırıq. Ölkəmizin nüfuzuna zərər vura biləcək məsuliyyətsiz yanaşmaların qarşısının alınması üçün hüquqi və ictimai müstəvidə mübarizəmizi davam etdirəcəyik.

Mən bu günlərdə baş verənlərdən qorxmuram. Mən geri çəkilən insan deyiləm. Mənim güvəndiyim əsas məqam qanun, dövlətçilik və Allahın ədalətidir. Hər kəs öz sözünə və əməlinə görə məsuliyyət daşımalıdır.
İnanıram ki, bütün bu məsələlər hüquqi müstəvidə obyektiv şəkildə araşdırılacaq və həqiqətlər ortaya çıxacaq.

David Seliverstovun geniş müsahibəsini təqdim edirik.

Telegramda izləyin