"Loqos" Psixoloji və Nitq Mərkəzi ilə Təhsil və Tələbə Krediti Fondu arasında 3 illik memorandum imzalandı

"Loqos" Psixoloji və Nitq Mərkəzi ilə Təhsil və Tələbə Krediti Fondu arasında əməkdaşlığın yeni mərhələsini müəyyən edən 3 illik memorandum imzalanıb.

Sonxeber.az xəbər verir ki, memorandumun əsas məqsədi təhsil və psixoloji xidmətlər sahəsində əməkdaşlığın genişləndirilməsi, tələbə və gənclərin psixoloji rifahının dəstəklənməsi, onların təhsil prosesində qarşılaşdıqları psixoloji və sosial çətinliklərin aradan qaldırılmasına töhfə verməkdir.

Əməkdaşlıq çərçivəsində psixoloji maarifləndirmə tədbirlərinin, seminar və görüşlərin keçirilməsi, gənclərin psixoloji dayanıqlığının gücləndirilməsi, təhsil mühitində sağlam psixoloji atmosferin formalaşdırılmasına yönəlmiş təşəbbüslərin həyata keçirilməsi nəzərdə tutulur.

Memorandum çərçivəsində tələbələrin və gənclərin fərdi inkişafına, emosional rifahına və sosial adaptasiyasına dəstək verilməsi də əsas istiqamətlərdən biri olacaq. Xüsusilə təhsil həyatında stress, imtahan həyəcanı, gələcəklə bağlı narahatlıqlar, sosial münasibətlər və şəxsi inkişaf kimi məsələlər üzrə maarifləndirici fəaliyyətlərin həyata keçirilməsi əməkdaşlığın praktik istiqamətlərini təşkil edə bilər.

Tərəflər hesab edirlər ki, müasir təhsil yalnız akademik biliklərin əldə olunması ilə məhdudlaşmamalı, eyni zamanda gənclərin psixoloji sağlamlığının, sosial bacarıqlarının və həyata hazırlığının dəstəklənməsini də əhatə etməlidir.

3 il müddətinə imzalanan memorandumun qarşılıqlı əməkdaşlığın sistemli şəkildə inkişaf etdirilməsinə və təhsil mühitində psixoloji dəstək mexanizmlərinin daha da gücləndirilməsinə xidmət edəcəyi gözlənilir.

Bu əməkdaşlıq eyni zamanda təhsil, psixologiya və sosial dəstək sahələri arasında əlaqələrin möhkəmləndirilməsi baxımından əhəmiyyətli addım kimi qiymətləndirilir.

Telegramda izləyin