Tələbənin həm oxuyub, həm işləməsi karyerasına hansı üstünlükləri verə bilər? - AÇIQLAMA

Universitet illərində təhsillə yanaşı işləməyə üstünlük verən tələbələrin sayı artır. İş təcrübəsi tələbəyə həm maddi baxımdan dəstək ola, həm də gələcək peşə fəaliyyəti üçün praktiki bacarıqlar qazandıra bilər. Lakin iş saatlarının çox olması, yorğunluq və dərslərə kifayət qədər vaxt ayırmamaq təhsil nəticələrinə mənfi təsir göstərə bilər. Bu baxımdan tələbənin seçdiyi işin təhsil qrafikinə uyğun olması və vaxt bölgüsünü düzgün aparması mühüm əhəmiyyət daşıyır.

Bəs, tələbənin təhsillə yanaşı işləməsi gələcək karyerasına hansı üstünlükləri verə bilər, hansı hallarda bu, dərs nəticələrinə mənfi təsir göstərir və tələbə iş seçərkən təhsil ilə iş arasında balansı qorumaq üçün nələrə diqqət etməlidir?
Mövzu ilə bağlı Sonxeber.az-a açıqlama verən təhsil eksperti Rizvan Fikrətoğlu bildirib ki, tələbələrin təhsil aldığı müddətdə işləməsi düzgün təşkil olunarsa, gələcək karyeraları üçün kifayət qədər faydalı ola bilər.

"Universitet yalnız nəzəri biliklərin əldə edildiyi məkan deyil, həm də əmək bazarına hazırlıq mərhələsidir. Tələbənin oxuduğu ixtisasla bağlı və ya ona yaxın sahədə işləməsi əldə etdiyi nəzəri bilikləri praktikada sınamasına, iş mühitində tanınmasına, kommunikasiya və komanda ilə işləmək bacarığının inkişaf etdirilməsinə imkan yaradır. Eyni zamanda, CV-də real iş təcrübəsinin olması məzun olduqdan sonra işə qəbul prosesində müəyyən üstünlüklər qazandıra bilər. Lakin burada əsas məsələ işləməyin özü deyil, iş və təhsil arasındakı balansdır. Tələbə uzun iş saatlarına cəlb olunursa, gecə növbəsində çalışırsa və ya iş qrafiki dərslərlə toqquşursa, bunun akademik nəticələrə mənfi təsir göstərməsi mümkündür. Yorğunluq, yuxu rejiminin pozulması, dərslərə hazırlaşmağa vaxtın azalması, imtahan və seminarlar üçün kifayət qədər vaxt ayıra bilməmək nəticədə qiymətlərin aşağı düşməsinə səbəb ola bilər. Xüsusilə ilk kurslarda universitet mühitinə uyğunlaşma prosesi gedərkən ağır iş qrafiki tələbə üçün əlavə yük yarada bilər".

Ekspert bildirib ki, tələbə iş seçərkən ilk növbədə iş saatlarına və qrafikin çevikliyinə diqqət etməlidir:

"İş universitetdəki dərslərin hesabına qurulmamalıdır. İkinci mühüm məqam isə işin tələbənin ixtisasına və gələcək karyera istiqamətinə nə dərəcədə uyğun olmasıdır. Məsələn, iqtisadiyyat tələbəsinin mühasibatlıqda, hüquq tələbəsinin hüquq şirkətində, jurnalistika tələbəsinin media sahəsində çalışması həm gəlir əldə etmək, həm də peşəkar təcrübə toplamaq baxımından daha məqsədəuyğun ola bilər. Bununla yanaşı, tələbə yalnız yüksək maaşa görə iş seçməməlidir. İşin qazandırdığı təcrübə, peşəkar əlaqələr, inkişaf imkanları və gələcək karyeraya verəcəyi töhfə də nəzərə alınmalıdır. Bəzən daha az maaşlı, lakin ixtisasla əlaqəli iş təcrübəsi tələbənin gələcək karyerasına daha böyük töhfə verə bilər".

Onun sözlərinə görə, balansın qorunması üçün tələbənin konkret həftəlik planı olmalıdır:

"Dərs, müstəqil hazırlıq, iş, istirahət və yuxu üçün vaxt əvvəlcədən müəyyənləşdirilməlidir. Əgər tələbə görürsə ki, iş səbəbindən dərslərdə davamiyyəti azalır, tapşırıqları gecikir və akademik nəticələri pisləşir, bu zaman iş saatlarını azaltmaq və ya daha çevik işə keçmək lazımdır. Burada universitetlərin də üzərinə müəyyən məsuliyyət düşür. Part-time, çevik qrafikli və tələbələrin dərs cədvəlinə uyğun iş imkanlarının artırılması həm gənclərin əmək bazarına erkən inteqrasiyasına, həm də təhsilin keyfiyyətinin qorunmasına xidmət edə bilər. Nəticə etibarilə, tələbələrin işləməsi təhsilə alternativ olmamalıdır, təhsili tamamlayan təcrübəyə çevrilməlidir. Əgər iş tələbənin bilik və bacarıqlarını artırır, ona peşəkar mühit qazandırır və təhsil prosesini pozmursa, bu, gələcək karyera üçün ciddi üstünlük yarada bilər. Əksinə, iş təhsilin önünə keçirsə və tələbənin qısamüddətli gəlir naminə uzunmüddətli peşəkar inkişaf imkanlarını itirməsi riskini yaradırsa, bu, məqsədəuyğun deyil".

Röyalə Xəyal

Telegramda izləyin