Ağlayan qadının şikayəti böyük dələduzluq şəbəkəsini üzə çıxardı - 2 milyonluq köçürmənin qarşısı alındı - VİDEO

Türkiyənin Samsun şəhərində polis əməkdaşlarının ağlayan bir qadını görərək onunla maraqlanması nəticəsində böyük dələduzluq işi üzə çıxıb. Özlərini polis və prokuror kimi təqdim edən şəxslərin qadının evini satdıraraq 2 milyon 329 min lirəsini ələ keçirdiyi müəyyənləşib.

Sonxeber.az xarici mediaya istinadla xəbər verir ki, qadının ifadəsindən sonra Samsun polisi araşdırmaya başlayıb və şübhəlilərin Şanlıurfanın Haliliye rayonundakı bağ evindən istifadə etdiyini müəyyən edib. Evdə təhlükəsizlik kameralarının quraşdırıldığı və ərazinin nəzarətdə saxlanıldığı aşkarlanıb.

Sentyabrın 15-də Samsun və Şanlıurfa polisinin birgə keçirdiyi əməliyyat zamanı bağ evinə daxil olan əməkdaşlar 3 şübhəlini saxlayıb. Əməliyyat vaxtı şübhəlilərin iki mobil telefonu pəncərədən həyətə atdığı müəyyən edilib. Telefonlar polis tərəfindən tapılaraq götürülüb.

Əməliyyat zamanı şübhəlilərin Ankarada yaşayan başqa bir qadınla telefonla danışdığı da üzə çıxıb. Həmin qadının daha əvvəl şübhəlilərə 1 milyon 500 min lirə göndərdiyi, bu dəfə isə daha 2 milyon lirə köçürməyə hazırlaşdığı müəyyənləşib. Lakin qadın telefon danışığı zamanı əməliyyat səslərini eşidərək şübhələnib və banka getməkdən imtina edib. Daha sonra polisə müraciət edən qadının da dələduzluğun qurbanı olduğu müəyyənləşib. Beləliklə, daha 2 milyon lirənin şübhəlilərə göndərilməsinin qarşısı alınıb.

Bağ evində aparılan axtarış zamanı 10 mobil telefon, 8 SIM kart, 2 planşet, noutbuk və kamera qeyd cihazı, həmçinin 56 ədəd Lyrica və Captagon olduğu ehtimal edilən 12 həb aşkarlanıb.

Keçirilən əməliyyatlar nəticəsində ümumilikdə 9 şübhəli saxlanılıb. Hadisə ilə bağlı araşdırma davam edir.

Telegramda izləyin