Bank kredit borcuna görə borclunun qohumlarına zəng edə bilər? - AÇIQLAMA

Son dövrlər kredit borcu olan şəxslərin yaxınlarına bank və ya bank adından fəaliyyət göstərən şəxslər tərəfindən zəng edilməsi ilə bağlı narazılıqlar gündəmə gəlir. Borclunun qohumunun kredit müqaviləsində zamin və ya digər hüquqi tərəf olub-olmaması burada mühüm əhəmiyyət daşıyır. Xüsusilə borclunun razılığı olmadan onun kredit borcu, gecikməsi və maliyyə vəziyyəti barədə məlumatların üçüncü şəxslərə bildirilməsi bank sirri və şəxsi məlumatların qorunması baxımından suallar yaradır.

Bəs, bank kredit borcuna görə borclunun qohumlarına hansı hallarda zəng edə bilər, qohumun zamin olmadığı halda onunla borc barədə məlumat paylaşılması qanun pozuntusu hesab edilə bilərmi və vətəndaş belə hal ilə qarşılaşdıqda hüquqlarını necə qoruya bilər?
Mövzu ilə bağlı Sonxeber.az-a açıqlama verən bank eksperti Emin Kərimov bildirib ki, müştəri banka təqdim etdiyi əlaqə nömrələri üzrə gecikmə olduğu halda həmin şəxslərlə əlaqə saxlanılacağı barədə kredit götürərkən xəbərdar edilir.

"Bu nömrələrin əsas məqsədi müştərini birbaşa tapmaq mümkün olmadıqda, zənglərə cavab vermədikdə və ya onunla əlaqə yaratmaq mümkün olmadıqda, təqdim etdiyi şəxslər vasitəsilə müştəri ilə əlaqə qurmaqdır. Kredit götürərkən müraciət ərizəsi ilə yanaşı, əlaqə nömrələri, e-mail və digər əlaqə vasitələrinin qeyd olunduğu anket forması doldurulur. Şəxs adətən həmin formada birinci dərəcəli qohumlarının və ailə üzvlərinin əlaqə nömrələrini qeyd edir. Bank qanunvericiliyinin və ümumi qanunvericiliyin tələbləri o halda pozula bilər ki, müştəriyə aid şəxsi və ya kredit məlumatları onun təqdim etdiyi nömrələrin sahiblərinə açıqlansın. Məsələn, müştəri gecikmədədirsə, ona zəng çatmırsa, ölkədə deyilsə, nömrəsini dəyişibsə və bankın onunla birbaşa əlaqə yaratmaq cəhdləri nəticə vermirsə, təqdim etdiyi əlaqə nömrələri, xüsusilə də birinci dərəcəli qohumlarının nömrələri ilə əlaqə saxlanıla və müştərinin axtarıldığı, ödəniş vaxtının çatdığı və ya ödənişi gecikdirdiyi barədə məlumat verilə bilər".

Ekspert bildirib ki, şəxslərin də kredit götürərkən əlaqə nömrəsini təqdim etdiyi qohumlarını bu barədə əvvəlcədən məlumatlandırması və onların razılığını alması daha məqsədəuyğundur:

"Çünki sonradan bank həmin şəxslə əlaqə saxladıqda onun bundan xəbərsiz olması ilə bağlı narazılıq yarana bilər. Ümumən, şəxsi məlumatların qorunması ilə bağlı qanunvericiliyin müəyyən tələbləri və standartları var. Müştərinin şəxsi məlumatları üçüncü şəxslərə və ya sonradan müəyyən edilmiş qohum, tanış və digər şəxslərin nömrələrinə açıqlanarsa, bu, qanun pozuntusu sayıla bilər. Lakin müştərinin özü tərəfindən banka könüllü şəkildə təqdim edilmiş qohumlarının əlaqə nömrələri ilə məlumatlandırma və xəbərdarlıq məqsədilə əlaqə saxlanılması fərqli məsələdir. Kredit götürərkən müştəriyə bildirilir ki, ödənişdən yayınması və ya onunla əlaqə yaratmağın mümkün olmaması halında təqdim etdiyi əlaqə nömrələri vasitəsilə yaxınları ilə əlaqə saxlanılaraq onun axtarıldığı və ödəniş vaxtının çatdığı barədə məlumat verilə bilər. Bununla belə, müştəriyə aid şəxsi və kredit məlumatlarının həmin şəxslərlə paylaşılması artıq qanun pozuntusu sayıla bilər".

Röyalə Xəyal

Telegramda izləyin