Ev təmiri zamanı ən çox hansı problemlər çıxır?

Ev təmiri zamanı köhnə hissələr söküldükcə divar, döşəmə, elektrik və su xətləri ilə bağlı problemlər üzə çıxır. Buna görə ev təmiri etməzdən əvvəl evin vəziyyətini yoxlamaq və görüləcək işləri müəyyən etmək vacibdir. Bu yoxlama hansı hissələrin dəyişdirilməli, hansı hissələrin isə sadəcə təmir edilməli olduğunu müəyyən etməyə kömək edir.

Ev təmiri zamanı divar və tavanda hansı problemlər olur?

Divar və tavanda ən çox çat, nəmlik, əyrilik və köhnə suvağın tökülməsi problemi olur. Köhnə boya və ya divar kağızı çıxarılanda divarın real vəziyyəti daha aydın görünür. Bəzi yerlərdə sadəcə rəngləmə kifayət edir, bəzi hissələrdə isə suvağın yenilənməsi lazım olur.
Divarda və ya tavanda su ləkəsi varsa, əvvəlcə nəmin səbəbi tapılmalıdır. Problem su borusundan, damdan və ya başqa yerdən gələn sızma ilə bağlı olur. Sızma aradan qaldırılmadan divarı rəngləmək problemi həll etmir. Bir müddət sonra boya yenidən qabara və ləkələr təkrar görünə bilər.

Ev təmiri zamanı elektrik xətlərində hansı problemlər çıxır?

Köhnə evlərdə elektrik naqilləri, rozetkalar və açarlar təmir zamanı problem yarada bilər. Bəzi otaqlarda rozetkaların sayı az olur, bəzilərində isə onlar istifadə üçün uyğun yerdə yerləşmir. Köhnə elektrik xətlərinin vəziyyətinin də yoxlanması lazım gəlir.
Divarlar rənglənməzdən əvvəl televizor, kondisioner, soyuducu, paltaryuyan və digər cihazların yeri müəyyən edilməlidir. Rozetkalar buna uyğun yerləşdirildikdə sonradan divarı yenidən açmağa ehtiyac qalmır. Xüsusilə mətbəxdə elektrik nöqtələri mebel və məişət texnikasının yerləşməsinə uyğun planlaşdırılmalıdır.

Su və kanalizasiya xətlərində hansı problemlər olur?

Hamam və mətbəx təmirində köhnə su və kanalizasiya xətləri tez-tez əlavə iş yaradır. Borularda sızma, birləşmələrdə problem, suyun zəif gəlməsi və kanalizasiyanın gec axması kimi hallar ortaya çıxa bilər.
Kafel söküləndən sonra boruların vəziyyətini yoxlamaq daha rahat olur. Dəyişdirilməli hissələr varsa, bu iş yeni kafel vurulmazdan əvvəl görülməlidir. Əks halda boruda sonradan yaranan problemə görə yeni kafeli sökmək lazım gələ bilər.
Hamam və mətbəxdə avadanlıqların yeri dəyişirsə, su və kanalizasiya xətlərinin yeri də əvvəlcədən nəzərə alınmalıdır.

Döşəmədə hansı problemlər yaranır?

Köhnə laminat, parket və ya kafel çıxarılanda döşəmənin əyri olduğu görünə bilər. Səthdə çatlar, boşluqlar və nəmlik də ola bilər. Bu problemlər aradan qaldırılmadan yeni döşəmə örtüyünün vurulması sonradan əlavə problem yarada bilər.
Əyri səthə laminat vurulduqda bəzi hissələr hərəkət edə və səs verə bilər. Buna görə əvvəlcə alt səth yoxlanmalı və lazım olan yerlər düzəldilməlidir. Döşəmənin hündürlüyü də nəzərə alınmalıdır. Yeni kafel və ya laminat əvvəlkindən hündür olarsa, qapıların açılıb-bağlanmasında problem yarana bilər. Döşəmə və qapı işlərini birlikdə planlaşdırmaq daha düzgündür.

Ev təmiri zamanı əlavə xərclər niyə yaranır?

Ev temiri zamanı əlavə xərclər əsasən əvvəlcədən görünməyən problemlərə görə yaranır. Köhnə kafel söküldükdən sonra divarın düzəldilməsi, döşəmənin hazırlanması və ya boruların dəyişdirilməsi lazım ola bilər. Bunların hər biri ilkin hesablamaya əlavə xərc gətirir.
Materialların düzgün hesablanmaması da büdcəyə təsir edir. Kafel, laminat, boya və digər materialların miqdarı əvvəlcədən düzgün müəyyən edilməlidir. Təmir davam edərkən plana yeni işlərin əlavə olunması da ümumi xərci artırır.

Telegramda izləyin