Məktəb mühitində əsas prinsiplərdən biri bərabərlikdir - AÇIQLAMA

"Məktəbli formasına yalnız geyim tələbi kimi yanaşmaq düzgün deyil. Burada əsas hədəf məktəbdə vahid, səliqəli, rahat və təhsil mühitinə uyğun geyim anlayışının formalaşdırılmasıdır. Eyni zamanda, vahid məktəbli geyimi məktəbin ümumi atmosferinə, şagirdlər arasındakı münasibətlərə və onların sosial mühitə uyğunlaşmasına təsir göstərən amillərdən biri hesab oluna bilər".

Bunu Sonxeber.az-a açıqlamasında təhsil eksperti Çingiz Səfərli bildirib.

O, bildirib ki, məktəb mühitində əsas prinsiplərdən biri bərabərlikdir:

"Uşaqlar ailələrinin maddi vəziyyətindən, sosial mövqeyindən, etnik və dini mənsubiyyətindən asılı olmayaraq təhsil müəssisəsinə ilk növbədə şagird kimi gəlirlər. Eyni sinifdə təhsil alan uşaqlar arasında geyim və xarici görünüşə görə sosial fərqlərin ön plana çıxarılmaması mühüm məsələdir. Vahid forma bu cür fərqlərin məktəb mühitində özünü göstərməsini müəyyən qədər azaldır, həmçinin şagirdlərin geyimlərinə görə müqayisə olunması və ayrı-seçkiliyə məruz qalması ehtimalını aşağı salır. Digər diqqətçəkən məqam dövlət təhsil sisteminin dünyəvi mahiyyətidir. Məktəb müxtəlif ailələrdən, fərqli sosial və mədəni mühitlərdən gələn uşaqları bir araya gətirən ortaq, neytral və hər kəs üçün əlçatan məkan olmalıdır. Vahid geyim standartlarının tətbiqi də belə bir ümumi məktəb mühitinin qorunmasına xidmət edən vasitələrdən biri kimi nəzərdən keçirilə bilər".

Onun sözlərinə görə, məktəbli formasının uşaqlarda məktəbə və kollektivə bağlılıq duyğusunun yaranmasına, müəyyən qaydalara riayət etmək vərdişinin formalaşmasına və məsuliyyət hissinin inkişafına da təsiri ola bilər:

"Lakin bunun üçün formanın uşaqların yaşına uyğun, rahat, praktik və gündəlik istifadəyə yararlı olması vacibdir. Geyim şagird üçün əlavə narahatlıq yaratmamalı, əksinə, onun məktəb həyatında özünü daha rahat hiss etməsinə şərait yaratmalıdır. Bu prosesdə məktəb-valideyn əməkdaşlığı da mühüm rol oynayır. Təhsil müəssisəsində müəyyənləşdirilən daxili qaydalara və geyim tələblərinə riayət edilməsi yalnız şagirdin üzərinə düşən öhdəlik kimi qəbul edilməməlidir. Valideynlər, məktəb rəhbərliyi və şagirdlər həmin qaydaların hansı məqsədə xidmət etdiyini düzgün başa düşməli və bu istiqamətdə birgə fəaliyyət göstərməlidirlər. Beləliklə, vahid məktəbli geyiminin əsas məqsədi bütün uşaqları sadəcə eyni formada geyindirməkdən ibarət deyil. Burada başlıca hədəf sosial fərqlərin mümkün qədər arxa plana çəkildiyi, hər bir uşağın özünü kollektivin bərabərhüquqlu üzvü kimi hiss etdiyi və diqqətin geyimdən daha çox təhsilə və şagirdin inkişafına yönəldildiyi sağlam məktəb mühitinin yaradılmasıdır".

Röyalə Xəyal

Telegramda izləyin