Bakıda daşınmaz əmlak alarkən hansı amillərə diqqət etmək lazımdır? - AÇIQLAMA

Bakıda daşınmaz əmlak almaq istəyən şəxs üçün "hansı rayon daha yaxşıdır?" sualından daha vacib məsələ əslində budur: bu gün alınan əmlakın gələcəkdə dəyərinə təsir edə biləcək fundamental amillər hansı ərazilərdə daha çox mövcuddur?

Əmlak məsələləri üzrə ekspert Fərid Cəfərli bu barədə Sonxeber.az -a açıqlama verib:

"Əmlak seçimində yalnız bugünkü qiymətə baxmaq kifayət etmir. Əsas məsələ həmin ərazinin inkişaf perspektivini də nəzərə almaqdır. Burada nəqliyyat infrastrukturu, metroya çıxış, yeni yollar, sosial infrastruktur, yeni yaşayış və kommersiya layihələri, ərazidə torpaq ehtiyatlarının azalması və daşınmaz əmlaka real tələbin səviyyəsi birlikdə qiymətləndirilməlidir.
İlk növbədə Xətai rayonunun inkişaf edən hissələrini qeyd etmək olar. Xüsusilə Ağ Şəhər və onun ətrafında şəhərsalma, nəqliyyat və yeni tikinti prosesləri ərazinin strukturunu dəyişir. Bundan əlavə, Bakı Metropoliteninin 2030-cu il inkişaf sxemində Ağ Şəhər, NZS, keçmiş Bakı Avtomobil Zavodu ərazisi və Həzi Aslanov istiqamətində yeni stansiyaların nəzərdə tutulması bu ərazilərin nəqliyyat əlçatanlığı baxımından perspektivini artıran amillərdən biri kimi qiymətləndirilə bilər. Belə infrastruktur layihələri ərazinin əlçatanlığını artırmaqla daşınmaz əmlakın gələcək bazar cəlbediciliyinə də təsir göstərə bilər.

Digər istiqamət kimi Yasamal rayonunun inkişaf edən hissələrini göstərmək mümkündür. Burada əsas üstünlüklər artıq formalaşmış yaşayış mühiti, şəhər mərkəzinə yaxınlıq, nəqliyyat və sosial infrastrukturun mövcudluğudur. Bu amillər ərazidə daşınmaz əmlaka tələbin qorunmasına və likvidliyin yüksək olmasına təsir edən əsas faktorlardandır.

Nərimanov və Nəsimi kimi mərkəzə yaxın rayonlarda isə fərqli üstünlük mövcuddur. Burada əsas faktor ərazinin gələcəkdə sıfırdan formalaşması deyil, artıq mövcud olan yüksək tələb və likvidlikdir. 2026-cı ilin məlumatlarında Nərimanov və Nəsimi ikinci bazarda yüksək qiymətli rayonlar sırasında görünür. Bu səbəbdən belə ərazilərdə alıcı üçün əsas meyar yalnız əmlakı aşağı qiymətə alaraq qısa müddətdə bahalaşmasını gözləmək deyil, həm də əmlakın uzunmüddətli dəyərini qoruması və zərurət yarandıqda asanlıqla satıla bilməsidir.

Digər tərəfdən, Sabunçu, Suraxanı, Binəqədi və Xəzər rayonlarının müəyyən hissələri daha aşağı giriş qiymətləri baxımından diqqət çəkə bilər. Lakin bu ərazilərdə seçim zamanı yalnız qiymətə deyil, konkret lokasiyanın nəqliyyat imkanlarına, infrastrukturuna, yeni layihələrə, sənədləşmə vəziyyətinə və gələcək inkişaf potensialına da baxmaq vacibdir.

Nəticə etibarilə, Bakıda daşınmaz əmlak seçərkən "ən yaxşı rayon" anlayışından daha çox konkret ərazinin hansı fundamental üstünlüklərə malik olduğuna diqqət yetirmək lazımdır. Eyni rayon daxilində belə, küçə, nəqliyyat əlçatanlığı, binanın yerləşməsi, sənədləşməsi və ətraf infrastruktur kimi amillər əmlakın gələcək dəyərinə ciddi təsir göstərə bilər".

Telegramda izləyin