Çoxmərtəbəli binalarda təhlükəsizlik necə təmin edilir? - AÇIQLAMA

Çoxmərtəbəli binalarda sakinlərin təhlükəsizliyinin təmin olunması həm tikinti mərhələsində, həm də binanın istismarı dövründə bir sıra tələblərə əməl edilməsini tələb edir. Xüsusilə yanğın, zəlzələ və digər fövqəladə hallar zamanı insanların binanı təhlükəsiz şəkildə tərk edə bilməsi, təxliyə yollarının əlçatan olması və mühəndis-kommunikasiya sistemlərinin işlək vəziyyətdə saxlanılması mühüm əhəmiyyət daşıyır.

Bəs, çoxmərtəbəli binalarda sakinlərin təhlükəsizliyinin təmin olunması üçün hansı əsas tələblərə əməl edilməlidir və yanğın, zəlzələ və digər fövqəladə hallarda insanların təhlükəsizliyini təmin etmək üçün binalarda hansı sistem və tədbirlər mütləq olmalıdır?
Mövzu ilə bağlı Sonxeber.az-a açıqlama verən təhlükəsizlik məsələləri üzrə ekspert Samir Nəbiyev bildirib ki, təhlükəsizlik yalnız binada mühafizəçinin, kameranın və ya odsöndürənin olması ilə təmin edilmir.

"Əsas yanaşma üç istiqaməti birləşdirməlidir: binanın konstruktiv dayanıqlığı, işlək mühafizə sistemləri və məsuliyyətli idarəetmə. Mənzil Məcəlləsinin 141.1-ci maddəsi də binanın idarə edilməsinin sakinlər üçün təhlükəsiz yaşayış şəraitini və ümumi əmlakın lazımi saxlanmasını təmin etməsini tələb edir. Yəni təhlükəsizlik əlavə xidmət deyil, binanın idarə olunmasının əsas vəzifəsidir. Binanın hündürlüyünə, xüsusiyyətlərinə və tətbiq olunan normalara uyğun yanğın aşkarlama və xəbərdarlıq, tüstüdən mühafizə, yanğın su təchizatı, ilkin yanğınsöndürmə vasitələri, qəza işıqlandırması və təxliyə nişanları təmin edilməlidir. Avtomatik yanğınsöndürmə sistemi isə normaların tələb etdiyi sahələrdə quraşdırılmalıdır. Bütün çoxmərtəbəli binalar üçün istisnasız eyni avadanlıq siyahısını məcburi tələb kimi təqdim etmək düzgün deyil. Lakin tələb olunan sistemlərin işlək vəziyyətdə saxlanılması mütləqdir".

Ekspert bildirib ki, pilləkənlər və çıxışlar əşyalarla tutulmamalı, yanğına qarşı qapılar sökülməməli, onların öz-özünə bağlanma mexanizmləri sıradan çıxarılmamalıdır:

"Yanğın avtomobillərinin binaya və su mənbələrinə yaxınlaşması da təmin olunmalıdır. Çünki siqnalizasiya təhlükə barədə xəbər verir, lakin insanların təhlükəsiz çıxması üçün təxliyə yollarının da yararlı vəziyyətdə olması vacibdir. Zəlzələ təhlükəsizliyində əsas məsələ binanın qrunt şəraiti və seysmik təsirlər nəzərə alınmaqla layihələndirilməsi, keyfiyyətli tikilməsi və daşıyıcı konstruksiyalarının qorunmasıdır. Təmir adı ilə daşıyıcı divarlara, sütunlara və tirlərə özbaşına müdaxilə edilməməlidir. Təhlükəli çatlar və deformasiyalar kosmetik təmirlə örtülməməli, mühəndis müayinəsi ilə qiymətləndirilməlidir. Binanın təhlükəsizliyini yalnız xarici görünüşünə əsasən müəyyənləşdirmək olmaz".

Onun sözlərinə görə, davranış qaydası da fərqlidir: zəlzələ zamanı bina silkələnərkən pilləkənlərə qaçmaq əvəzinə, pəncərələrdən uzaqda möhkəm masa altında baş və boynu qoruyaraq təkanların dayanmasını gözləmək tövsiyə olunur:

"Liftdən istifadə edilməməlidir. Qaz və elektrik qurğularına, tüstü bacalarına və havalandırmaya vaxtında texniki xidmət göstərilməlidir. Elektrik şəbəkələri normaya uyğun avtomatik mühafizə ilə təmin olunmalıdır. Xüsusilə vurğulamaq lazımdır ki, "Qaz təchizatı haqqında" Qanunun 24.6-cı maddəsi qaz qurğusu istifadə olunan qapalı məkanlarda qaz sızmasını və dəm qazını aşkar edən detektorların quraşdırılmasını və işlək saxlanmasını tələb edir. Bu, sadəcə tövsiyə deyil. İdarəedici tərəf sistemlərin dövri yoxlanılmasını, sınaqdan keçirilməsini və təmirini təşkil etməli, nəticələri sənədləşdirməli, sakinləri təhlükəsizlik qaydaları ilə tanış etməlidir. Xidmət heyəti fövqəladə vəziyyətdə öz vəzifəsini bilməlidir. Sakinlər də mənzildə təhlükəsizlik qaydalarına əməl etməli və ümumi təxliyə yollarını bağlamamalıdırlar".

Röyalə Xəyal

Telegramda izləyin