The Guardian: "ABŞ-da hakim televiziya kanalına qarşı cinayət işi başlatmağa çalışıb"

ABŞ-ın Luiziana ştatında bir hakim onun daşınmaz əmlak sövdələşməsi barədə yayımlanan araşdırmadan sonra televiziya kanalından şikayət edib.

The Guardian yazır ki, hakim Kimya Holmes yerli CBS filialı WWL Louisiana barədə polisə müraciət edib. Mübahisə jurnalist David Hammerin hakimlə bağlı apardığı araşdırmadan sonra başlayıb. Materialda hakimin 2025-ci ildə həmin vaxt nişanlı olduğu şəxsdən 765 min dollarlıq ev aldığı barədə məlumatlar yer alıb.

Sonxeber.az The Guardian-a istinadən xəbər verir ki, hakim daha sonra televiziya kanalından evinin ünvanının və avtomobilinin dövlət nömrə nişanının yayımdan çıxarılmasını tələb edib. Kanal bəzi məlumatları sonradan gizlətsə də, mənbələrini açıqlamaqdan imtina edib. Məsələnin diqqətçəkən tərəfi isə hakimin polisə müraciətində istinad etdiyi qanunla bağlıdır. The Guardian bildirir ki, həmin qanunun məlumatların yayımdan çıxarılmasını tələb edən və buna görə cinayət məsuliyyəti nəzərdə tutan müddəaları avqustun 1-dən qüvvədə deyil.

Media hüquqşünasları da şikayətin hüquqi əsasının olmadığını bildiriblər. Hadisə ABŞ-da jurnalistlərin mənbələrinin və ictimai əhəmiyyət daşıyan məlumatların qorunması ilə bağlı müzakirələri yenidən gündəmə gətirib.

Müəllif: İlkin Məmmədkərimov

Telegramda izləyin