2027-ci ildə maaş və pensiyalar nə qədər artacaq? - VÜQAR BAYRAMOVDAN AÇIQLAMA

2027-ci il yaxınlaşdıqca Azərbaycanda əhalinin gəlirləri ilə bağlı əsas gözləntilərdən biri minimum əməkhaqqı və pensiyaların necə dəyişəcəyi ilə bağlıdır. 2026-cı ildə əmək pensiyaları 9,3 faiz indeksləşdirilərək artırılıb, minimum əməkhaqqının məbləğinə isə ildə ən azı bir dəfə yenidən baxılması qanunvericilikdə təsbit olunub. 2027-ci ilin büdcə göstəricilərinin hazırlanması fonunda maaş və pensiyaların artırılması məsələsi yenidən gündəmə gəlib.

Hazırda minimum əməkhaqqının 400 manat olduğu nəzərə alınaraq, gələn il bu məbləğin hansı həddə çatdırıla biləcəyi və pensiyaların neçə faiz artırılacağı maraq doğurur. Bəs 2027-ci ildən minimum əməkhaqqı və pensiyalar nə qədər arta bilər? Artım hansı göstəricilər əsasında müəyyənləşdirilə bilər?
Mövzu ilə bağlı millət vəkili Vüqar Bayramov Sonxeber.az-a açıqlamasında bildirdi ki, Əmək Məcəlləsinə edilən dəyişikliklərə əsasən Azərbaycanda minimum əmək haqqının ildə ən azı bir dəfə baxılması nəzərdə tutulub. Bu dəyişikliklər cənab prezident tərəfindən 2026-cı ilin fevral ayında təsdiq olundu. Bu isə ondan xəbər verir ki, məhz 2027-ci ilin fevral ayınadək Azərbaycanda minimum əmək haqqı məbləğinə yenidən baxılacaq və təbiiki minimum əmək haqqı məbləğində artımların olacağı gözlənilir. O baxımdan 2027-ci ildə minimum əmək haqqının artacağı gözləniləndir. Çünki bu Əmək Məcəlləsində edilən dəyişikliklərin əsas istiqamətlərindən biridir. Eyni zamanda təbiiki sosial təminat tədbirləri çərçivəsində biz mütamadi olaraq minimum əmək haqqı və digər sosial müavinətlərin artırılmasını müşahidə edirik.

Xüsusən son 6 ildə həyata keçirilən beş paketin əsas istiqamətləri məhz minimum əmək haqqında artımlarla bağlıdır. O baxımdan növbəti ildə minimum əmək haqqının artırılacağı və bununda 2027-ci ilin dövlət büdcəsində nəzərdə tutulacağı gözlənilir. Büdcə paketi miqrasiyaya təqdim olunduqdan sonra təbiiki daha dəqiq rəqəmləri müzakirə etmək mümkün olacaq. Eyni zamanda pensiyaların indeksləşdirilməsidə növbəti ilin yanvarında baş verəcək və bu 2026-cı ildə orta aylıq əmək haqqında artım faizinə uyğun olaraq indeksləşdirmənin aparılması və əmək pensiyası alan vətəndaşlarımızın pensiya məbləğlərinə şamil olunması anlamına gəlir.

Bütövlükdə növbəti ilin dövlət büdcəsindən sosial sferaya ayırılan vəsaitin həcmi ümumi büdcə xərclərinin 44%-ni təşkil edəcəyi gözlənilir. Bu 17 milyard manatdan artıq vəsaitin sosial istiqamətə yönələcəyindən xəbər verir. O baxımdan rəqəmlər ondan xəbər verir ki, növbəti ildə də sosial təminat tədbirləri əsas prioritetlərdən biri olaraq qalacaq.

Müəllif: İlkin Məmmədkərimov

Telegramda izləyin