Diş ağzından deyil, gözündən çıxdı - 16 yaşlı oğlanda inanılmaz hadisə - FOTO

Hindistanda 16 yaşlı yeniyetmənin göz qapağında olduqca nadir tibbi hadisə aşkarlanıb.

Musavat.com xəbər verir ki, yeniyetmə təxminən bir ay davam edən, ağrı verməyən sol üst göz qapağındakı şişkinlik səbəbindən həkimə müraciət edib. Müayinə zamanı həkimlər iki sərt, ağ çıxıntı görüblər.

Kompüter tomoqrafiyası həmin nahiyədə dişə bənzər, tac və kök hissəsi olan strukturun mövcudluğunu göstərib. Diş göz yuvasının yuxarı divarından inkişaf edərək göz qapağının toxumasına doğru uzanıb.

Cərrahlar onu əməliyyatla çıxarıblar. Məlum olub ki, bu, tam formalaşmış yetkin köpək dişidir. Müayinələr zamanı şiş və ya buna bənzər başqa törəmələr aşkarlanmayıb.

Həkimlər bu vəziyyəti ektopik diş adlandırırlar. Belə dişlər normal yerləşməli olduğu nahiyədən kənarda inkişaf edir. İndiyədək burun boşluğunda, sinuslarda və digər qeyri-adi nahiyələrdə ektopik dişlərə rast gəlinsə də, göz yuvasının yuxarı hissəsində belə hal olduqca nadirdir.

Telegramda izləyin