Sürücülər üçün sığorta haqları ARTACAQ? - Ekspertdən AÇIQLAMA

Azərbaycanda avtonəqliyyat vasitəsi sahiblərinin icbari sığortası üzrə yığımların 10,7 faiz, sığorta ödənişlərinin isə 20,2 faiz artması avtomobil sığortası bazarında ödənişlərin daha sürətli yüksəldiyini göstərir. Ödənişlərin yığımlardan daha sürətlə artması sığorta şirkətlərinin maliyyə yükünə və gələcəkdə sığorta haqlarının formalaşmasına təsir göstərə biləcək məsələlərdəndir.

Bəs, avtonəqliyyat vasitəsi sahiblərinin icbari sığortası üzrə yığımların 10,7 faiz, sığorta ödənişlərinin isə 20,2 faiz artmasının əsas səbəbləri nələrdir və ödənişlərin yığımlardan daha sürətli artması sığorta bazarının maliyyə dayanıqlığına və gələcəkdə sürücülər üçün sığorta haqlarının dəyişməsinə necə təsir göstərə bilər?
Mövzu ilə bağlı Sonxeber.az-a açıqlama verən sığorta eksperti Emil Ağabağırov bildirib ki, hər iki istiqamətdə göstəricilərin artımını həm ölkəmizə gələn yeni nəsil avtomobillərin sayının artması, həm də hadisələrin çoxalması ilə əlaqələndirmək olar.

"Sadəcə, ödənişlərin nisbətən daha çox olmasının səbəbi ondan ibarətdir ki, bu gün ölkədə əvvəlki kimi yalnız səhər və axşam saatlarında deyil, gün ərzində də nəqliyyat intensivliyi müşahidə olunur. Bu da hadisələrin sayına daha çox təsir edir. Gələcəkdə sığorta şirkətlərinin dayanıqlığını daha da təmin etmək üçün yığımların, eyni zamanda digər könüllü sığorta növlərinin artırılması istiqamətində müəyyən addımlar atılmalıdır. Digər könüllü sığorta növlərinin satışının artırılması ümumilikdə sığorta şirkətlərinin dayanıqlığını təmin edə bilər".

Ekspert bildirib ki, qiymətlərlə bağlı isə hazırda sürücülər üçün hər hansı artım gözlənilmir:

"Bu gün avtoicbari sığorta üzrə 5 min manatdan çox əmlak təminatı verilirsə, hələlik bu rəqəmlər yetərlidir. Bununla yanaşı, vətəndaşlar əlavə olaraq təxminən 20-30 manat ödəməklə daha 5 min manatlıq əmlak təminatı ala bilərlər. Bu imkanlar mövcuddur və hazırda bununla bağlı qiymət artımı gözlənilmir".

Röyalə Xəyal

Telegramda izləyin