Gündüz İsmayılov: Gənclərin milli-mənəvi dəyərlər ruhunda tərbiyəsi aktual məsələlərdəndir

Dini Qurumlarla İş üzrə Dövlət Komitəsinin sədr müavini Gündüz İsmayılov gənclərin milli-mənəvi dəyərlər ruhunda tərbiyəsinin, dini maarifləndirmənin və bu sahədə aidiyyəti qurumların fəaliyyətinin əlaqələndirilməsinin vacibliyini vurğulayıb.

BiG.AZ xəbər verir ki, o, "Gənc nəslin milli-mənəvi dəyərlər ruhunda tərbiyəsi" mövzusunda konfransda bildirib ki, Dini Qurumlarla İş üzrə Dövlət Komitəsi Gənclər və İdman Nazirliyi ilə birgə milli-mənəvi dəyərlərin təbliği, dini radikalizmlə mübarizə və dini maarifləndirmə istiqamətində silsilə tədbirlər keçirir.

G.İsmayılov qeyd edib ki, bu istiqamətdə indiyədək Elm və Təhsil Nazirliyi, Ailə, Qadın və Uşaq Problemləri üzrə Dövlət Komitəsi, eləcə də Gənclər və İdman Nazirliyi ilə birgə tədbirlər təşkil olunub. Onun sözlərinə görə, keçirilən konfrans da gənclərin dini maarifləndirilməsi, milli-mənəvi dəyərlərin təbliği və bu sahədə görülən işlərin əlaqələndirilməsi məqsədi daşıyır.

Komitə sədrinin müavini bildirib ki, gənclərin milli-mənəvi dəyərlər ruhunda tərbiyəsi yalnız vətənpərvərlik hisslərinin formalaşdırılması, dilə və dinə sağlam münasibətin aşılanması ilə məhdudlaşmır. Bu prosesdə sosial şəbəkələrin təsiri, ailənin və cəmiyyətin rolu da xüsusi əhəmiyyət daşıyır.

O vurğulayıb ki, gənclərin milli-mənəvi dəyərlər ruhunda tərbiyəsində din xadimlərinin və dini icmaların da rolu böyükdür. Konfransda Gənclər və İdman Nazirliyinin, gənclər təşkilatlarının və yerli strukturların nümayəndələri ilə yanaşı, ölkənin müxtəlif bölgələrindən din xadimləri, dini icma sədrləri və ilahiyyatçılar iştirak edirlər.

G.İsmayılovun sözlərinə görə, əsas məqsəd ailə, təhsil, cəmiyyət və dini icmaların bu prosesdə iştirakını müzakirə etmək, fəaliyyətin daha effektiv əlaqələndirilməsinə nail olmaq, eləcə də sosial şəbəkələrin və medianın imkanlarından istifadə etməklə görülən işləri gücləndirməkdir.

O əlavə edib ki, dini icmaların və din xadimlərinin bu istiqamətdəki fəaliyyətinin daha da gücləndirilməsinə ehtiyac var.

Aynur Babazadə

Telegramda izləyin