Vahid məktəbli forması ayrı-seçkiliyin qarşısını alır - AÇIQLAMA

"Məktəblərdə vahid geyim formasının tətbiqi yalnız vizual tələb deyil, həm də təhsilin dünyəvilik prinsipi və sosial bərabərlik məsələsidir. Məktəb uşaqların sosial statusundan, ailələrinin maddi imkanlarından və ya dini mənsubiyyətindən asılı olmayaraq hər bir şagirdin özünü bərabər hiss etməli olduğu sosial məkandır. Vahid forma şagirdlər arasında fərqlilikləri və ayrı-seçkilik risklərini aradan qaldırır, diqqəti yalnız təhsilə və fərdi inkişafa yönəldir".
Bunu Sonxeber.az-a açıqlamasında təhsil eksperti Əmrah Həsənli bildirib.

O, bildirib ki, tarazlıq məsələsinə gəldikdə isə, Azərbaycan modeli dünyada nadir nümunələrdəndir ki, burada dünyəvi dövlətçilik anlayışı ilə milli-mənəvi, o cümlədən dini dəyərlərə ehtiram bir-birini inkar etmir, əksinə, tamamlayır:

"Ölkəmizdə vətəndaşların dini etiqad azadlığı Konstitusiya ilə təmin olunur. Lakin xüsusilə azyaşlı və gənc nəslin formalaşdığı təhsil müəssisələrində qaydalar hamı üçün eyni və bərabər olmalıdır. Məqsəd kiminsə inancını məhdudlaşdırmaq deyil, təhsil mühitini kənar ideoloji və ya dini təsirlərdən azad saxlayaraq neytral və sağlam mühit yaratmaqdır. Dünyəvi təhsil məhz uşağın gələcəkdə öz müstəqil seçimini edə bilməsi üçün azad və elmi düşüncə zəmini formalaşdırır. Buna görə də ən doğru yanaşma dövlətin qanunlarına, Nazirlər Kabinetinin qərarlarına və məktəbin daxili nizam-intizam qaydalarına hər bir vətəndaşın qeyd-şərtsiz riayət etməsidir. Çünki qanuna hörmət olan yerdə həm hüquq, həm də etiqad azadlığı ən yüksək səviyyədə qorunur".

Röyalə Xəyal

Telegramda izləyin