ABŞ-də pilotlar 12 min metr yüksəklikdə UNO gördülər

ABŞ-nin Uçan Naməlum Obyektlərin (UNO) Öyrənilməsi üzrə Milli Mərkəzi (NUFORC) Ohayo ştatı üzərində naməlum obyektlə qarşılaşan pilotların hesabatını dərc edib.

Oxu.Az xəbər verir ki, bu barədə "Daily Mail" nəşri məlumat yayıb.

Məlumata görə, 2026-cı il avqustun 16-da mülki təyyarəni idarə edən pilotlar yaxınlıqlarında naməlum obyekt müşahidə ediblər.

NUFORC-un məruzəsinə əsasən, onlar dərhal ən yaxın hava limanının dispetçeri ilə əlaqə saxlayaraq gördükləri mənzərəni təsvir ediblər. Təyyarə təxminən 12 min metr hündürlükdə uçarkən pilotlar onlardan bir kilometr yuxarıda uzunluğu on metrə çatan hamar, gümüşü rəngli obyekt gördüklərini deyiblər.

Naməlum uçan obyekt uzunsov həb formasında olub. Onun səthində heç bir bükülmə və ya qat yeri diqqət çəkməyib. Bununla belə, hava gəmisinin toqquşma xəbərdarlığı sistemi işə düşməyib. Pilotların məlumat verdiyi dispetçer isə radar ekranlarında heç bir obyekt aşkarlamadığını bildirib.

Uçuş heyətinin üzvlərindən birinin ehtimalına görə, UNO onların keçməyə çalışdığı fırtına buludlarının arasından çıxıb. Onun fikrincə, təyyarənin mühərriklərinin buzlaması və güclü turbulentlik kimi hava şəraitində bu cisim hava şarı ola bilməzdi.

ABŞ-nin Mülki Aviasiya üzrə Federal İdarəsi NUFORC tərəfindən tənqidlərə məruz qalıb. Belə ki, naməlum obyektlə bağlı məlumatların digər müvafiq orqanlara ötürülməsinə dair heç bir sübut yoxdur.

NUFORC ekspertlərinin qənaətinə görə, bu cür laqeyd yanaşma və hadisənin araşdırılmaması ümumi uçuş təhlükəsizliyini risk altında qoyur.

Telegramda izləyin