Almaniya Ukraynaya "Patriot" göndərməyəcək

Almaniya öz müdafiəsində kritik boşluqların yaranması riski səbəbindən artıq Ukraynaya "Patriot" zenit-raket kompleksləri tədarük etmək imkanına malik deyil.

Oxu.Az xəbər verir ki, bu barədə ölkənin müdafiə naziri Boris Pistorius "Funke" media qrupuna müsahibəsində bildirib.

"Xüsusilə "Patriot" kompleksləri ilə təchizat prosesi çətindir. Almaniya indiyə qədər bir neçə sistem və onlara aid çox sayda idarəolunan raketlər verib. Hazırda bundan artığını edə bilmərik. İndi verəcəyimiz hər hansı bir silahın yerini müvəqqəti olaraq doldura bilməyəcəyik, bu isə müdafiəmizdə zəifləməyə səbəb olacaq. Belə addım atmağa ixtiyarımız yoxdur", - deyə nazir vurğulayıb.

Bununla yanaşı, nazir digər dövlətlərin qat-qat az iş gördüyünü diqqətə çatdırıb və bu səbəbdən Almaniyanın tərəfdaşlarından daha çox səy gözlədiyini qeyd edib:

"Biz noyabrın ortalarında Ukrayna üzrə Təmas Qrupunun növbəti görüşündə bu məsələni çox ciddi şəkildə müzakirə etməliyik".

Eyni zamanda, Pistorius Ukraynada yaxın vaxtlarda atəşkəs ehtimalının yüksək olmadığını vurğulayıb.

O deyib ki, Kiyevə yardımın dayandırılması Mərkəzi və Qərbi Avropa ölkələrinə ukraynalı qaçqınların kütləvi axınına səbəb olacaq.

Nəzərə çatdıraq ki, Almaniya 2022-ci ildən etibarən Kiyevə təqribən 43.3 milyard avro həcmində humanitar, 57.6 milyard avro məbləğində isə hərbi yardım ayırıb. Rəsmi kanallarla yanaşı, bir sıra özəl və ictimai Almaniya təşkilatları da müntəzəm olaraq ölkəyə humanitar yüklərin daşınmasını həyata keçirirlər.

Telegramda izləyin