Merz Aİ-nin büdcəsində Ukraynaya dəstəyin əks olunmasını tələb edib

Almaniya kansleri Fridrix Merz Ukraynaya Avropa İttifaqının (Aİ) dəstəyinin qurumun növbəti yeddiillik büdcəsində tam şəkildə nəzərə alınmalı olduğunu bildirib.
Bizimyol.info xəbər verir ki, bu barədə o, Berlində Macarıstanın Baş naziri Peter Magyarla birgə keçirdiyi mətbuat konfransında danışıb.

Merzin sözlərinə görə, Aİ büdcəsinin hazırlanması zamanı müdafiə qabiliyyətinin və rəqabətqabiliyyətliliyin artırılması ilə yanaşı, Ukraynaya gələcək illərdə göstəriləcək maliyyə dəstəyi də əsas prioritetlərdən biri olmalıdır.

Kansler vurğulayıb ki, Ukraynaya yardım yalnız ayrı-ayrı üzv dövlətlərin deyil, bütün Avropanın ortaq məsuliyyətidir. O, bu məsələnin Aİ-nin büdcə müzakirələrində tam əksini tapmasının vacibliyini qeyd edib.

Qeyd edək ki, bundan əvvəl Financial Times qəzeti Merzin Avropa Şurasının rəhbəri Antonio Koştaya ünvanladığı məktubda Ukraynaya maliyyə yardımının bütün Aİ ölkələri tərəfindən öhdəlik kimi qəbul edilməyəcəyi təqdirdə, qurumun yeddiillik büdcəsinin təsdiqinə mane ola biləcəyini yazmışdı.

Telegramda izləyin