İranın təhdidlərindən sonra ABŞ maliyyə naziri hərbi bazaya köçürüldü

ABŞ maliyyə naziri Skott Bessent İran tərəfindən həyatına qarşı təhdidlər olduğu barədə məlumatlardan sonra Vaşinqtondakı iqamətgahını tərk edərək hərbi bazaya köçürülüb.

Bu barədə "Reuters" agentliyi məsələ ilə tanış olan iki mənbəyə istinadən məlumat yayıb.

Məlumata görə, ABŞ administrasiyasının yüksək vəzifəli kəşfiyyat rəsmisi ötən ay hazırladığı məruzədə İranın ABŞ hərbçilərinə və Amerika vətəndaşlarına qarşı mümkün sui-qəsd planlarının daha təhlükəli mərhələyə çatdığı barədə xəbərdarlıq edib.

Sonxeber.az Reuters-ə istinadən xəbər verir ki, Skott Bessent avqust ayından etibarən İranı iqtisadi cəhətdən zəiflətməyə yönəlmiş sanksiya və maliyyə təzyiqi kampaniyasına rəhbərlik edir. "Economic Outcast" adlandırılan bu kampaniyanın əsas məqsədi Tehranın gəmilərə qarşı hücumları dayandırmasına və Hörmüz boğazının yenidən açılmasına nail olmaqdır.

ABŞ Maliyyə Nazirliyinin nümayəndəsi bildirib ki, nazir İranın təhdidlərindən çəkinməyəcək və iqtisadi təzyiq siyasətini davam etdirəcək.

Mənbələrin bildirdiyinə görə, Bessentin təhlükəsizliyi ilə bağlı narahatlıqlar "The Wall Street Journal" qəzetində onun Vaşinqtondakı evinin yerləşdiyi ərazini müəyyənləşdirməyə imkan verən hava görüntüsünün dərcindən sonra daha da artıb.

Qeyd edək ki, İran daha əvvəl ABŞ ərazisindəki rəsmilərə və vətəndaşlara qarşı hücum planlaşdırması ilə bağlı ittihamları rədd edib. ABŞ rəsmiləri isə Tehranın xarici ölkələrdə genişmiqyaslı hücum həyata keçirmək imkanlarının məhdud olduğunu bildiriblər.

Müəllif: İlkin Məmmədkərimov

Telegramda izləyin