Bu gün Cəmil Məmmədlinin şəhadətə çatdığı gündür - FOTO

Bu gün 44 günlük Vətən müharibəsi zamanı şəhadətə çatan Cəmil Habil oğlu Məmmədlinin ölümünün ildönümüdür.

Sonxeber.az-ın verdiyi məlumata görə, 2020-ci ilin iyul ayında ali təhsilini başa vurduqdan sonra Cəmil hərbi xidmətə yollanıb. Xidmətinin yeni başlanmasına baxmayaraq, sentyabrın 27-də Vətən müharibəsinin ilk günlərindən ön cəbhəyə göndərilməsini xahiş edib və Füzuli rayonunun işğaldan azad olunması uğrunda döyüşlərdə fəal iştirak edib.

Əsgərlikdə olduğu zaman evlərinə zəng edib anası ilə danışanda böyük fəxarət hissi ilə, Milli Qəhraman şəhid Mübariz İbrahimovun istifadə etdiyi silahdan ona verildiyini söyləyib.

O, oktyabr ayının 14-dən 15-ə keçən gecə Füzuli rayonunun Dördçinar kəndi istiqamətində qəhrəmancasına vuruşaraq şəhidlik zirvəsinə yüksəlib.

Azərbaycan Respublikası Prezidentinin Sərəncamı ilə Cəmil Habil oğlu Məmmədli ölümündən sonra "Vətən uğrunda", "Xocavəndin azad olunmasına görə", "Füzulinin azad olunmasına görə" və "Cəsur döyüşçü" medalı ilə təltif edilib.

Qeyd edək ki, şəhid Cəmil təhsil aldığı dövrdə ictimai fəallığı və Vətənə xüsusi sevgisi ilə həmişə seçilib. Xocalı soyqırımı qurbanlarının xatirəsinə həsr olunan məktəblər arası "Mahir nişançı" adlı güllə atıcılığı turnirində III yerə layiq görülüb.

Aysel Səfərzadə

Telegramda izləyin