Doğum günü olan şəhidlərimiz - FOTO

44 günlük Vətən müharibəsində şəhidlik zirvəsinə ucalan altı qəhrəmanımızın doğum günüdür.

Sonxeber.az Vətən müharibəsi şəhidlərinin əziz xatirəsini dərin hörmət və ehtiramla yad edir.

Azərbaycan Ordusunun əsgəri Qasımzadə Tahir Sərdar oğlu 31 oktyabr 2001-ci ildə anadan olub.

Azərbaycan Ordusunun əsgəri olan Tahir Qasımzadə 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Murovdağ istiqamətində gedən döyüşlərdə savaşıb.

O, ötən ilin sentyabrın 29-da Murovdağ döyüşləri zamanı Kəlbəcər rayonu ərazisində şəhid olub.

Şəhidimiz "Vətən uğrunda", "Döyüşdə fərqlənməyə görə" və "Kəlbəcərin azad olunmasına görə" medalları ilə təltif edilib.

Azərbaycan Ordusunun əsgəri Rəhimli Murad İlqar oğlu 31 oktyabr 1991-ci ildə Sumqayıt şəhərində anadan olub.

O, Suqovuşan uğrunda gedən ağır döyüşlərdə mənfur düşmən tərəfindən atılan artilleriya mərmisinin partlaması nəticəsində aldığı qəlpə yarasından həlak olub.
Onun geridə iki övladı yadigar qalıb.

Şəhidimiz "Vətən uğrunda" medalı ilə təltif edilib.

Azərbaycan Ordusunun giziri Tağıyev Ramiq Teymur oğlu 1998-ci il oktyabrın 31-də Lerik rayonunun Kəlvəz kəndində anadan olub.

2004-2015-ci illərdə F. Şahbazov adına Kəlvəz kənd tam orta məktəbində təhsil alıb.

Ramiq Tağıyev 2016-2018-ci illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. 2018-ci ildən isə gizir hərbi rütbəsində müddətdən artıq həqiqi hərbi qulluqçu olaraq xidmət edirdi.

O, Vətən Müharibəsi zamanı Cəbrayılın, Füzulinin və Şuşanın azadlığı uğrunda gedən döyüşlərdə savaşıb.

Şəhidimiz Şuşa şəhəri ərazisində döyüş tapşırığını yerinə yetirərkən düşmən tərəfindən atılan artilleriya mərmisinin partlayışı nəticəsində aldığı çox saylı qəlpə zədələnməsindən şəhid olub.

Azərbaycan Ordusunun əsgəri Tahirov Rəşid Loğman oğlu 1989-cü il oktyabrın 31-də Beyləqan rayonunun Qaradağlı kəndində anadan olub. O, Vətən Müharibəsi başlayan gündən könüllü olaraq cəbhəyə yollanıb.

O, Ermənistanın işğalı altında olan ərazilərin azad edilməsi və Azərbaycanın ərazi bütövlüyünün bərpa olunması uğrunda qəhrəmancasına savaşıb.

Gənc əsgər noyabrın 6-da Şuşa şəhəri istiqamətində gedən döyüşlərdə düşmənin artilleriya atəşi nəticəsində şəhid olub .

O, "Vətən uğrunda", "Füzulinin azad olunmasına görə" və "Döyüşdə fərqlənməyə görə" medalları ilə təltif edilib.

Azərbaycan Respublikası Silahlı Qüvvələrinin hərbi qulluqçusu Alıyev Qələndər Nofəl oğlu 31 oktyabr 2001-ci ildə Bakı şəhərinin Sabunçu rayonunda dünyaya gəlib.

Qələndər Alıyev 2020-ci il, yanvarın 8-də hərbi xidmətə çağırılıb. O, Vətən müharibəsinin ilk günlərindən döyüşlərə qoşulub,Talış-Suqovuşan bölgəsində döyüşüb.

O, oktyabr ayının 10-da, elə Talış-Suqovuşan istiqamətində gedən qızğın döyüşlərin birində şəhid olub.

Şəhid Alıyev "Suqovuşanın azad olunmasına görə" medalı ilə təltif edilib.

Telegramda izləyin

instagramda izləyin